welcome

Welcome our visitors that come to visit us on our Blog
This blog reflects the views of its owners only
You have the right to agree or disagree with our views

مرحباً بكل زائر يدخل على مدونتنا
هذه المدونة تعبر عن آراء أصحابها فقط
لك الحق أن تتفق أو لا تتفق مع آراءنا
الصفحة الرئيسية للمدونة على الفيسبوك :( https://www.facebook.com/pages/Egyptian-Sokrat-egygirl-mn2ota-Blog/254929104594264 )

Adver.

Mar 15, 2012

زواني هذا العصر

في يوم شربت كوبايه شاي بالنعناع كبييره وبعدها قعدت افكر ازاي المسيح يسمح لنفسه انه يقعد مع العشار والزواني ؟ طيب لو انا زي المسيح يبقي لازم أعمل زيييه نقعد معاهم برضوا
مش لازم يبقوا عشارين وزواني حرفيا بس علي الاقل ناس الخطيه باينه في حياتهم عكسنا احنا بتوع الكنايس اللي  عارفين نترسم علي الناس كويس اوي وعاملين فيها ملايكه هذا العصر
يالا مش دي القضيه عشان انا ما بصدق افتح في الموضوع ده
العشار يعني اللي بيعمل خطايا كتيير بس ممكن تبقي الخطايا العاديه اللي هي منتشره اليومين دول -كام شتيمه علي كام كلمه مش بناءه علي كام هزاره ملهاش لزمه علي كام تقصير مع ربنا والقعده معاه وطبعا كل ده مش قدام الناس - انا بكتب علي الفيس بوك ترانيم وايات وعندي نص الفرندس خدام ومرنمين
طيب الزواني؟؟؟؟؟
لأ ده كده الموضوع بدأ يدخل في أعراض - الزواني دول الناس اللي الخطيه في حياتهم واضحه جدا (مفضوحه يعني )
كام سيجاره محشيه كانت او مش محشيه علي كام واحد ملهوش في الديين ولا ليه في أئ شئ غير يشتم في 
 النااس ويسبب ال ........ 
يه انا زودتها صح ؟ معلش  
بعد ما خلصت كوبايه الشاي ودخلت في شرب البيبسي طلعت بنتيجه رهييبه
غير ان اسناني وجعتني طبعا من شرب السخن وبعيده الساقع
اكتشفت ان ربنا جه علي الارض علشان المرضي مش الأصحاء
جه علي الأرض علشان كل الخطاه اللي أولهم أنا
جه علي الأرض علشان يعلمني أبقي شبهه 
يعني أصحابك اللي انت مصاحبهم من ورا اهلك علشان دينهم مختلف او عشان هما فاسدين - ولا اصحابك اللي مكسوف تمشي معاهم عشان لسانهم فالت بين الشتيمه والشتيمه كلمه - ولا اصحابك اللي بتقابلهم في المظاهرات والمسيرات يقعدوا يسبوا الديين او تلاقيهم اصلا ملحديين 
لازم اقرب منهم مش اقرف منهم واقولهم يااي انتوا ناس من عالم تاني - انا ربنا مديني نعمه اني ابقي ولد/بنت كويس مش زيكم معندكوش مبادئ ولا اخلاق
اللي عايزه اوصله بعد ما ملقتش حاجه اشربها 
 فيه ايه في الكتاب بتقول - صرت لليهودي كيهودي واليوناني يوناني والذين بلا ناموس كاني بلا ناموس علشان اربح كل الناس دي للمسيح
دلوقتي لا الترانيم ولا الوعظ بيجيبوا مع الناس
انت بس مطلوب منك تعاملهم ببساطه - بمحبه - متتكسفش ان اصحابك وحشين - لا ده عادي بس خليك انت اللي مختلف - خليهم دايما يسألوك ليه احنا بنعمل كده وانت مبتعملش زيينا 
لو مسألوش السؤال ده بشكل مباشر أكيد هيبقي جواهم
بالأختصار أرمي بذره في كل واحد تعرفه - ارمي محبه 
لو انت شايف دورك - انك تصلي بس في الكنيسه ؟ 
اوكي اميين انا مقولتش لأ بس خلي عندك دم وأتفاعل مع الجو اللي حواليك شويه مش لازم بشكل سياسي 
بس ميبقاش دورك أنك قاعد في بيتكم تتكلم بس علي فلان وعلان بيعمل ايه وبيقول ايه ؟؟
اذا كنت معندكش الجرأه تتدخل في وسط الناس اللي انا حكييت عليهم دول يبقي تحط لسانك جوه بقك وصليلهم ومتتكلمش عليهم وسيبهم في حالهم
بنت مصريه مسيحيه منقوطه من المسيحين
tota




No comments: