هذه التدوينة منقولة من سارة ممدوح
بدأت سارة تسرد مايحدث مع البنات من تحرشات يومياً في عربات المترو
وقد أطلقت على سلسلة مقالاتها أسم (مذكرات بنت مضروبه فى المترو)
وأليكم الجزئين الأول والثاني من هذه السلسلة
الجزء الأول
بصوا بقى انا قررت اكتب مذكراتى فى عربيه السيدات :
انا قررت انى هبدأ بأصعب موقف ممكن اى بنت تتحط فيه وهو ان واحد يضربها ,,, انا هبدأ بالمواقف اللى كان فيها ضرب علشان تعرفوا احنا وصلنا لفين و هتكلم بالاخص على موقفين هما الاهم و الاقوى والاعنف بالنسبه لى و النهارده انا هكلمكم عن اول حادثه ضرب حصلتلى
فى مره انا ركبت عربيه السيدات الحمرا اللى هى على طول سيدات لقيتها تقريبا فاضيه بس لقيت فيها واحد عمره مايعديش 24 سنه و معاه بنت و قاعدين مع بعض انا رحت بمنتهى الهدوء قلتله دى عربيه السيدات , قام قاللى بعد الساعه 9 مبيقباش فى الكلام ده قلتله لا دى على طول قاللى وانتى مالك هو انتى المسؤوله ؟؟ انا اول ماسمعته بيقول كده قلتله خلاص انا هجيبلك المسؤول و هتدفع غرامه كمان بقى ,, قامت البنت اللى معاه دى قالتلى انا اخته و هو معايا عادى , قلتلها انتى محرم ليه ذنبنا احنا ايه نبقى محرم كلنا لاخوكى ؟؟؟ و رحت وقفت عند الباب علشان ادور على اى عسكرى من اى محطه هيقف فيها المترو , اللى حصل بقى ان البنت دى اتعصبت جدا و معاها كام واحده تانيين و قالولى انتى مؤذيه وبجحه ماتسبيه قاعد فرضا طلع علينا بلطجى ( وده بقى الرد الشائع فى كل مره ) طيب وانتى ايه اللى عرفك انه مش هو اللى بلطجى ؟ المهم هو قعد يزعق والبنت اللى معاه قعدت تشتم وانا كل ده مبينالهم انى مش خايفه منهم ولا من 10 زيهم حتى علشان كده الولد ده كان خايف منى جدا وكان كل مالبنت تتكلم يقولها ماترديش عالاشكال دى كأن انا اللى غلطانه مثلا لغايه اما جت البنت دى حاولت تضربنى و الناس واقفه بتتفرج و مبيعملوش حاجه غير انهم بيزعقوا مع البنت دى انه ايه المشكله ما يفضل قاعد واللى مكنش بيقول كده مكنش بيتكلم اصلا !!! !!! المهم هو شافها بتعمل كده قام شتمنى شتيمه انا مفهمتهاش وعلشان انا مفهمتهاش عرفت انها شيمه قذره ومن رد فعل الناس اللى حواليا فهمت انها ( قبيحه بالقوى) المهم انا طبعا مردتش عليه بشتايم من نفس نوع شتيمته انا كل اللى انا عملته انى اتنرفزت عليه و بصراحه كان فى شياط طالع من دماغى بس هو اما لقانى لا شتمته بنفس نوع الشتايم ولا قمت عليه اكلته علقه حس ساعتها انه اقوى منى و انه ممكن ياخد بتاره منى ثمن تهزيئى ليه قدام "الستات " فى اللحظه دى قرر هو يضربنى الحمد لله كان فى واحده ست قد ماما واللى كانت الوحيده اللى معايا هى اللى كانت بتحوش عنى الضرب و اخدت بسببى ضرب كتير نتيجه انى انضربت منه و كان فى بينه و بينى الست دى ان صباعى اتجزع و فكى مكنتش بعرف احركه 3 ايام او كنت بحركه بصعوبه ,, و بعد كل ده الناس قالتلى انتى سافله ومتربتيش و تستاهلى علشان انتى بجحه و بتتكلمى مع الناس ببجاحه ( والبجاحه فى نظرهم انى قلتله انزل و اما كان بيهددنى مكنتش بخاف و انى كنت بدورله على عسكرى اطه ,, واما كان بيقول كلام كنت برد عليه و اكسفه قدام كل اللى موجودين ) و انا اصلا دى كانت اكتر مره حافظت فيها على هدوئى مع انى بتعصب كتير فى المواقف اللى زى دى زى ما هتشوفوا بعد كده لمهم الموضوع ده خلص ان اول ما محطه المترو اتفتحت انا قعدت اصرخ لغايه اما الناس اتلمت عليه و الست اللى كانت معايا قعدت تقوللهم كان بيضربها قاموا الرجاله اخدوه و نزلوه و ضربوه عالمحطة .
الجزء الثاني
اليوم التانى اللى هتكلم عنه المره دى كان يوم عجيب من كل النواحى لان محصلتش فيه حادثه اعتداء واحده لأ ده كانوا اكتر من واحده فى نفس الوقت هبدأ من اول ماركبت المترو طلعت لقيت فى ناس كتيييييييييييير قوى رجاله فى المترو وانا متعوده انى اما بلاقى كده بتأكد الاول انها عربيه السيدات الحمراء علشان محدش يقوللى دى الخضراء و نتخانق هى خضراء ولا حمراء ونسيب المشكله الاساسيه , انه راكب فى عربيه السيدات , المهم انا اول ما سألت بصيت لقيت كام بنت تانيين هما كمان بيقولوا لكل الذكور اللى موجودين و للاسف انا مش هقول عليهم " رجاله" ان دى عربيه السيدات حظى كل ما اقول لواحد يقولى ماهو كل الناس قاعدين اهه اشمعنى انا لغايه اما جيت عند واحد قاللى مانا عارف و لو جه عسكرى يدفعنى غرامه هنزل ,, انا بقى مش بس كان فيه شياط طلع من دماغى لأ انا كنت عايزه ارمى نفسى تحت المترو بعد ماقاللى الكلمه دى قلتله طيب انا اسفه انى جيت اتكلمت معاك اصلا اصلى كنت فاكراك واحد مينفعش تركب معانا وللاسف برده هو كان معاه مش بس واحده لأ كان معاه 3 ستات و طبعا هو كان عارف انه متحامى فيهم مش ده موضوعنا المهم اما انا قلتله كده قامت الست بتقوللى عايزه تقولى ايه يعنى ؟؟ قلتلها عايزه اقول انى مكنتش اعرف انه مستنى حته عسكرى ييجى يشده من قفاه و يدفعه غرامه علشان يعمل الصح ,, طبعا هو اتشال واتحط و قعد يزعق سبته يتكلم و اديتله ظهرى ولا كأنه موجود فواحده بتتكلم معايا و الناس وكلامها فى الغالب هو اللى بيزود المشكله هى بتقوللى مينفعش تعملى كده قلتلها مينفعش اعمل ايه واحد بيقوللى انا مبجيش غير بالضرب على قفايا انا غلطانه فى ايه ؟؟؟ قام هو الستات اللى معاه قعدوا يشتموا يشتموا و يزعقوا و الناس قعدت تقوللى انتى كمان بتقولى يتضرب ؟؟ ازاى تقولى كده وهو قعد يقولهم شفتوا ؟ عايزه تضربنى و قلب فيها سهوكه ,, المهم كلمه من واحد على كلمه من واحده جه كام شاب روش كده عاملين قال ايه فيها الشباب الجدعه الى بتهدى قعدوا يقلولى عيب كده و مينفعش تزعقى لراجل اصلا وانتى ازاى بتعملى كده و كلام كتير كده المهم الموضوع سخن مره واحده و اذ فجأه الاقى الولد ده بيرفع الجزمه عليا و بيقوللى انتى لازم تضربى بالجزمه انا ساكتلك من الصبح ,, انا بقى كنت اتعلمت من قبل كده عرفت انى لو بينتله خوفى هينقض عليا و محدش هيحوشه فعلا , قلتله انا مش خايفه منك و قربت منه وقلتله انا اهه ورينى هتضربنى ازاى قام هو عمل زى الفار اللى قعد يقول متحشونيش متحوشونيش و قاموا الشباب الروشه قعدوا يقولوا عيب هتضرب واحده و هى اصلا ماتستاهلش ؟؟؟ ساعتها بقى انا قلتلهم على فكره انتوا كمان غلطانين متعملوش فيها ملايكه انتوا كمان لازم تنزلوا
يادوبك الموضوع ده حصل ولسه بينزل الجزمه المترو اتفتح و ركب فيه 4 عيال محششين و ممكن يكون كان اكتر من الحشيش طلعوا علينا و كان لسه طبعا الناس كلها فى جدال ما بين المؤيد والمعارض ,, ال 4 دول فضلوا واقفين جنب الباب لغايه اما المترو اتحرك قاموا بدأوا يتعمقوا داخل المترو و بدأوا يقولوا كلام بشع و قذر جدا و كانوا بيتطوحوا جامد كان معانا فى العربيه ساعتها ذكور كتير اللى بمنطق كل ست سايباه و بتتخانق معايا هو " فرضا طلع علينا بلطجى " محدش قام اتحرك من مكانه الستات قعدت تقول للعيال دى انتوا ايه اللى جايبكوا هنا و تزعقلهم على اساس ان كان هييجى معاهم زعيق يعنى ساعتها انا قررت انسحب من الكلام لأن الموضوع دلوقتى مش دفاع عن حق الموضوع ساعتها كان حبة محششين بيتعاملوا قدامى و انا اكيد مش هقدر عليهم انا بقى من كتر المواقف اللى حصلتلى قبل اليوم ده حطيت فى دماغى ان اول ما يبقى فيه خطر استخدم فرمله المترو من غير تفكير , المهم قلعت جزمتى اللى سبحان الله كانت بكعب يومها بعد ما قعدت اتحايل على ناس كتير تدينى اى حاجه اكسر بيها الفرمله و محدش صدق انى ممكن اعمل كده يادوبك قلعت الجزمه بصيت لقيت بقى فى قدامى خط دفاع قدام الفرمله بتاعة المترو كل ده والمحششين دول قاعدين يتوغلوا فى المترو و بيتطوحوا ساعتها انا عملت مجنونه و طحت فى كل اللى واقفين خط دفاع عن فرمله المترو و مش هنسى ابدا جت واحده مسكتنى انا حدفتها من قدامى علشان اعرفهم ان انا اجن من المحششين كمان واللى هيقربلى الوقت ده هيتعور بقى علشان يرضوا انى اوقف المترو من المهزله اللى كانت بتحصل فيه دى المهم كسرت الفرمله بالفعل والمترو وقف ,, الناس تسكت؟؟؟ قعدوا بنتين يصرخوا و يصوتوا يقولوا للناس ادى دلوقتى المترو اللى جاى هيخبط فينا على اساس ان المترو اللى جاى ده مش هيقف فى المحطه اللى كنا فيها مثلا !!! المهم شويه نفس البنتين قعدوا يصوتوا تانى و يقولوا انتى اتسببتى ان المترو داس على واحد و خسرتيينا حياة واحد على اساس ان انا مشيت المترو زياده مش وقفته فجأه !!!!! المهم كل ده واحنا باب المترو مفتوح و محدش بيعبرنا ده غير ان العيال المحششه دول اول ما باب المترو فتح قالوا يا فكيك ,, المهم اما البنتين دول قعدوا يصوتوا انا قلت لازم اروح اطمن بقيت الناس اللى فى العربيه علشان محدش يخاف و كان فى اطفال رحت بقولهم يا جماعه حصل كذا كذا و متخافوش بصيت لقيت شاب من الشباب الروش اللى كان بيحوش عنى الجزمه و بيقوللى متزعقيش عيب جاى هو بقى يضربنى ,, طبعا هو فى اضعف موقف دلوقتى وانا كنت عارفه كده كويس و عارفه انه مش هيقدر يعمللى حاجه و المترو واقف فى نص السكه دليل على مشكله المهم وهو جاى لقيت بنت بتجرى بسرعه تحوشه عنى قلتلها سيبيه هو مش هيعرف يعمللى حاجه قام قايللى انتى ابرد بنى ادمه انا شفتها فى حياتى قلتله ليا الشرف جت البنت دى بتحوش عنى علشان حست انه هيمد ايده تانى قلتلها والله ومايقدر ينزل ايده ابعد من دماغه قام ساعتها راح خابط دماغه فى حيطة المترو و قعد يقولهم دى بارده يا جدعان هههه , ففى بنت بقى معجبهاش بجاحتى وكمان انى وقفت المترو وعطلته لقيتها جايه تجرى عليا عايزه تضربنى ساعتها فى بنات كتير مسكوها و هى قعدت تقوللى انتى موركييش حاجه احنا ورانا بيوت والوقت متأخر والساعه 11 قلتلها انتى مكنتيش مروحه المغرب وانا اللى عطلتلك قامت البنت اللى حاولت تحوش عنى الضرب من الولد دى واخدانى على جنب قالتلى مهمتك انتهت لحد هنا انا بقى اللى هقفلهم هى بصراحه كانت ب 10000000 راجل قالتلهم انتوا كلكوا بتهاجموها علشان انتوا مش عارفين تعملوا زيها قالت اللى هيقربلها انا بقى هضربه بالجزمه و هى كانت تجيب انها ممكن تشرحهم كلهم فى وقت واحد بصراحه ,, المهم فى بنات قامت و قعدتنى و بعدها المترو اتحرك من غير ماحد ييجى يسأل فينا قفل الباب واتحرك , قامت بنت بتقوللى انا ابويا بيتلككلى عالواحده و ممكن يقعدنى من الشغل لو روحت متأخره قلتلها انتى متعرفيش ظروفى انا كمان ايه , قامت فى بنت قعدت تقوللى انتى صح بس اما تحبى توقفى المترو وقفيه فى المحطه !!!!!!!!!!!!!!!!!!!!!!!!!!!!!!!!!!!!!!! انا حقيقى معرفش ازاى مجاليش انهيار عصبى من التعليق ده !!!!!!!! المهم بقى المترو وصل المحطه خلاص و نزل السواق يشوف ايه اللى حصل , طبعا اول ما المترو وقف نزلوا كلهم زى الفراخ حتى كمان اللى كان معترض عليا قالوا مش هنركب مع المجنونه دى نفس المترو المترو فضل فيه ناس قليله قوى ,, المهم اما جه السواق يشوف اللى حصل طبعا فى ناس كتير اتلمت من العربيات التانيه , اول ما عرفت انهم بيشوفوا ايه اللى حصل وبيحققوا انا قمت واحده قامت قالتلى انتى تعملى المصيبه و تمشى استنى الراجل بيحقق قلتلها انا رايحاله انا معملتش حاجه غلط علشان امشى اما رحت للسواق لقيت فى بتاع 10 بنات واقفي بيحكوا للناس والسواق على اللى حصل و لقيتهم بيدافعوا عنى جدا و قالوا مش كفايه انها سكتت على رفع الجزمه ؟؟؟ هى عملت كده علشان كلنا نروح بيوتنا فى سلام قام السواق سأل مين اللى عملت كده بقى قلتله انا قاللى انتى لسه كان هيقول حاجه قامت الناس اللى طلعت تتفرج عاللى حصل شددت السواق من القميص و قالوله انت ناوى تعمل معاها حاجه ولا ايه دى كانت بتدافع عن نفسها لان طبعا كلنا عارفين ان دى فيها مسائله قانونيه لو كان لسبب تافه و قاموا منزلينه من العربيه اصلا و قالولوا اتكل على الله يللا و خلص اليوم الغريب ده الحمد لله على خير من غير ماتضرببالجزمه اللى معرفش هى ازاى كانت قريبه منى كده ولا ازاى فلت من ضرب الشاب الروش ولا من ضرب البنت اللى جت تجرى علشان عطلتها وانا كنت بدافع عن حياتنا !!!!!!!!!
وسنتابع معكم باقي الأجزاء
