ثورة البنات - شاهد عيان على قضية نادية عادل وما حدث معها من تعنت من أدارة أمن مترو الأنفاق

مساء الخير والورود والفُل واليسمين على كل شعب مصر خاصةً ثائرات مصر الحرائر وعلى رأسهن :(سميرة أبراهيم ، آية محمد كمال الدكتورة الميدانية بالعباسية والتي تم الأعتداء عليها من قبل كلاب الجيش كسابقتها سميرة ، الفتيات المُعتدى عليهم في أعتصام مجلس الوزراء ، شيرين ثابت مُفجرة فكرة التدوين عن التحرش ، غادير أحمد ونادية عادل من مؤسسات حركة ثورة البنات وأبطال تدويناتي هذه)

اليوم هو الخميس الموافق 10 مايو 2012 ، كنت أجلس على مكتبي كعادتي اليومية أتابع جديد الأخبار والمقالات والتدوينات لأصدقائي أو لبعض الكُتاب الصحفيين الذين أهتم لمتابعتهم وكنت أتصفح صفحات الفيسبوك والتويتر لأصدقائي حتى فجائتني غادير أحمد (إحدى مؤسسات حركة ثورة البنات ) بما كتبته عن صديقتها نادية عادل ، وأليكم ما كتبته غادير على صفحتها : (صديقتى امبارح كانت في المترو الساعه 10 م في عربية السيدات فقط اللي عليها الشارة الحمرا وكان في رجالة في العربية ولما مرضيوش ينزلوا وقفت على الباب واستغاثت بأمن المترو ، الأمن كان رد فعله انه جه ضربها , صاحبتى نازلة تعمل شكوى دلوقتى ياريت لو حد يقدر يساعدها ويروح معاها يقولى لو سمحتوا ولو مش قادر تساعد ياريت تعمل شير يمكن حد يقدر يساعد من اصحابك) ….

أثارت كلماتها حفيظتي وتمنيت لو أستطع مساعدتها ومنع هذه الممارسات الغبية التي يقوم بها هذا النظام الوهابي المتخلف ؛ وتذكرت حينها موقفاً مشابهاً حدث أمامي منذ قرابة الأسبوعين في محطة التحرير ونفس الوقت تقريباً ، حيث دخل بعض الكلاب الضالة بعربية السيدات وحينما أعترضت الفتيات الموجودة بالعربة على هذا وأستنجدوا بأمن المترو ، كان رد فعل مسئولي الأمن بالمترو أأنهم ضربوا البنات ودفعوهوم بالأيدي والأقدام حتى يدخلوهم بالعربة ويغلقوا الباب حتى يتحرك المترو غير مهتمين بكون وجود أختراق لقوانين المترو بوجود ثلاثة من الكلاب داخل عربة السيدات ، فقد كان كل أهتمامهم هو أن يتحرك المترو مبررين ذلك بأن كل دقيقة تأخير في المترو تتكلف 200 جنيه … دا على أساس أن المترو منتظم في مواعيده وتلك الفتيات الضعيفات قد أخلوا بنظام المجتمع …. أحا يعني .

وكمان لو أنتوا يهمكوا أوي مصلحة المجتمع فيجب عليكم ترتيب الأولويات ، فقبل أن تعترضوا على خسارة المال فيجب أن تعترضوا على خسارة الأخلاق التي ضيعتوها بأيديكم .

أظنني أكون منصفاً لو تحدثت عن تأخير المترو على أنه شئ طبيعي فجميعنا يرى كيف أن القطار دائماً يتأخر حتى أنك قد تنتظره أكثر من نصف ساعة ، فهل يُحاسب المسئولين عن هذا ؟؟؟ أما أنكم لا تطبقون القانون إلا على فتيات مصر فقط وتتغاضون عن أنفسكم وكلابكم ؟

مطبقين المبدء الوهابي الجاهلي بأن من حقكم الأعتداء على المرأة وضربها لأنها عوجاء يجوز لكم أصلاحها …. أحا

الكلام دا لا يطبق على بنات مصر

فبنات مصر هن أشرف وأجمل وأرقى وأطهر بنات العالم ….

فقد أتى منهم نفرتيتي وكليوباترا وحاتشبسوت وشجرة الدُرملكات وأميرات مصر بل العالم كله .

وأيضاً سميرة أبراهيم والدكتورة آية محمد اللأي ضربن أقوى أمثلة الشرف والحفاظ عليه بأعتراضهم على كلاب العسكر الذين أعتدوا عليهن .

وأيضاً نبوية موسى إحدى رائدات التعليم والعمل الأجتماعي خلال النصف الأول من القرن العشرين وتلميذتها سميرة موسى عالمة الذرة المصرية ، التي يستفاد من أبحاثها على مستوى العالم كله .

أكرر

(لن يستطيع الجهل والتخلف الزاحف علينا من صحراء البادية الوهابية أن يسطو على بنات مصر)

أعود لكم لبطلة هذه التدوينة (نادية عادل) …. وسأحكي لكم بعض تفاصيل ماحدث معها حين ذهبت إلى أدارة المترو لعمل محضر بخصوص ما حدث معها كشاهد عيان على تعنت الجهات الأدارية المسئولة .

قد عرفنا سابقاً أنها توجهت لأدارة المترو لعمل محضر من الساعة الثانية من ظهر يوم الخميس الموافق 10 مايو 2012 لكنهم بدأوا يمارسوا معها كل أشكال التعنت والمماطلة والتعريص والأستهبال وكل حاجة مُقرفة ممكن تتخيلوها ، وبدأوا يرسلوها من مكتب لمكتب ومن أدارة لأدارة ومن مكان لمكان حتى حلول الساعة التاسعة مساءً حيث وصلت أخيراً إلى قسم رابع مترو الأنفاق بمحطة مترو العتبة وهنا أيضاً بدأوا يماطلون معها أيضاً حتى الساعة العاشرة والنصف تقريباً حين بدأوا أخيراً في كتابة المحضر بعد أن رأوا أصرار نادية ومن معها على المحضر ، مما جعلني أسقط عليهم المثل القائل :"مايجوش غير بالدق على دماغهم"

إليكم جانب من بعض المهاترات التي حدثت خلال مماطلتهم مع نادية ومن معها :

• مسئول أدارة المترو بيقولها أن موظفي المترو بيتضربوا دائماً من الناس ويسكتوا ، لازم أحنا كمان نسكت … أحا
  
• "ماينفعش أعمل تحقيق إلا لما أعرف مين الموظف اللي ضربك وأعرف هو عمل كدا ليه ؟؟؟؟"دا على أساس أن التحقيق اللي أنت عاوز تعمله مع الموظف هايكون بصفتك جوز أمه ولا أيه بالظبط ؟؟؟
  وكمان هاتعرفه أزاي من غير مايكون في محضر للتحقيق .وكمان قال جملة حلوة خالص قبلها … "وأنا أعرف اللي ضربك دا أزاي ؟؟" يعني لامؤخذة كدا هو أنتوا مش عندكم دفاتر تبين ورديات كل موظف أو عامل ولا أنتوا شغالين ببركة دعاء الوالدين ؟
  
• لما قالتله أن دي مش أول مرة يحصل فيها كدا .. رد عليها برد غبي قوي :"طيب ماعملتوش محضر قبل كدا ليه ؟"والنبي حد يُرد بدالي علشان أن لساني زفر .

أنهي تدوينتي إلى هنا على وعد بمحاولة أن أتابع لكم الموقف أولاً بأول …..

لكن قبل أن أترككم أنقل لكم ماكتبته غادير أحمد على صفحتها بعد أن أجرت مكالمة تليفونية مع نادية عادل :

(نادية عادل : عضوة من ثورة البنات منذ التأسيس

كانت شبه مقيمة في ثورة البنات بتتابع اول بأول

وبتشارك ومتضامنة مع اغلب المواضيع اللى بنطرحها

اتعرفت عليها شخصية من حوالي اسبوعين وبقينا اصحاب

اتفاجئت ب نادية عادل النهاردا بتتصل بيا وهي منهارة

وبتحكيلي إنها اتضربت من أمن المترو امبارح بالليل

الأربعاء 10 مايو 2012

نادية كانت بتتصل بيا تقولى انها عاوزة تعمل حملة على الصفحة

قولتلها لو عاوزة حملة ابدأي بنفسك وانزلى خدي حقك

قالتلى اعمل ايه انا مستعدة اعمل اي حاجة

قولتلها انزلى روحي إدارة المترو قدمي شكوى

واطلعى على القسم اعملى محضر واضمني حقك

وبالفعل اتشجعت جداا وكلمت لها اصحابي كريم ابو زيد وعبد الله المعلاوي

خدوا محامي وراحوا معاها القسم حرروا المحضر

وبنعلن إن نادية عادل عضوة من أعضاء الصفحة والصفحة مسئولة مسئولية كاملة عن تطورات قضية نادية عادل

ومش هنسيبها غير لما تاخد حقها بالشكل اللى يضمن إن محدش هيحصله كده تاني

الغريب إن نانسي مكنش معاها شهود

لكن الأغرب إن الشاهدة الوحيدة تقرا الإعلان الخاص بقضية نادية عادل

هنا على صفحة ثورة البنات

أيوة الشاهدة الوحيدة عضوة تانية من الصفحة

وأيوة إحنا كلنا واقفين جنب بعض لحد ما حقوقنا ترجع

ودي قصة الإعتداء اللى حصل لنادية عادل من أمن المترو

--

نادية عادل

بنت مصرية بتركب المترو زينا كلنا , نادية كانت راجعة من كنيسة قصر الدوبارة بعد صلاة من أجل مصر كل اسبوع يوم الإثنين والأربعاء ، إمبارح نادية اتأخرت وخرجت من الكنيسة الساعه 10 الا ربع بالليل ودخلت محطة مترو السادات علشان تركب وتروح بيتها زي كل مرة بس المرة دى كانت مختلفة ، نادية لما مشيت على رصيف الجيزة علشان تركب عربية السيدات فقط "اللى عليها الاستيكر الأحمر" واللى بتكون للسيدات فقط طول اليوم حتى بعد الساعه تسعة ، لقت خناقة وبنت واقفة بتتخانق وماسكة باب المترو علشان في شوية "ذكور" ركبوا عربية السيدات وكل الستات كانوا بيزعقوا ، نادية مسكت الباب علشان المترو ميقفلش وقالت للبنت حاولى تنزليهم وانا همسكلك الباب لأن إحنا مش كل يوم هنسكت على الوضع ده ، طبعا اللى بيركب مترو بعد الساعه 9 عارف ان الموضوع ده منتشر بس المرة دى قرروا يكونوا إيجابيين ويوقفوا الغلط ، فضل باب المترو مفتوح وكل الستات في العربية مستائين ومع ذلك الذكور مرضيوش ينزلوا برضو ، لحد لما أمن المترو وصل وبدل ما يمنع المخالفة دى وينزلهم من عربية السيدات ، اعتدي على البنات اللى ماسكين الباب بالضرب بالإيد وبالأحذية ، طبعا البنات مقدروش يستحملوا الضرب وباب المترو اتقفل ومشيت العربية ، طبعا نادية كانت منهارة وروحت منهارة واعصابها تعبانة وحست إن حقوقها ضايعة في بلدها ، في بلدها الستات بيتضربوا بالجزم وسلامات لأيام زمان لما كانت الست تستغيث بحد وكان يغيثها مش يمد إيده عليها ويرفع جزمته ويضربها ، نادية كانت ناوية تسكت لكن لما خرجت النهاردا حاولت تركب مترو وبعد ما قطعت التذكرة طلعت من المحطة وراحت خدت تاكسي لحد الشغل ، بس قالت ولو لمرة تاخد حقها في بلدها ونزلت عملت محضر ضد إدارة المترو اللى حاولوا يحلوا الموضوع ودي لكن فشلوا لما لاقوها مصممة على المحضر قالولها لو المترو مش عاجبك مكنتيش ركبتى و قالولها انتى عطلتى المترو لمدة تلت ساعة يعنى 20 دقيقة والدقيقة بـ200 جنيه يعنى عليكي لإدارة المترو 4000 جنيه غرامة ،بس هي صممت على موقفها وقالتلهم انا هاخد حقي منكم ، علشان كلمة واحدة بس : بنات مصر متنضربش بالجزم .

نادية حاسة بالإهانة , حاسة إن ملهاش حق في بلدها ، ملهاش قيمة ولا أهمية

انشروا وادعموا نادية عادل واقفوا جنبها ولو حتى على النت

عرفوا الناس بقضيتها وعرفوهم بقذارة وتدليس الهيئات الحكومية في مصر

حق نادية عادل ، حق كل بنات مصر .

---

آخر تطورات قضية نادية عادل

تم تحرير محضر ضد ادارة تشغيل المترو برقم 3/22 قسم رابع مترو الانفاق هايروح النيابة يوم الاتنين

نادية مكنش معاها شهود

لكن المفاجأة إن الشاهدة الوحيدة هى عضوة في ثورة البنات

شافت الخبر على الصفحة وقررت تشهد مع نادية عادل

قررت متبقاش سلبية وتقول وانا مالى

وقررت تروح النيابة تشهد بالواقعة وبالضرب والإعتداء على نادية واللى معاها

لسه فينا نخوة ولسه الخير منتهاش

حق نادية عادل ، حق كل بنت في مصر

---

ثورة البنات هتشيل من جوانا السلبية

هتخلينا نصرخ بالحق في وش الظلم

مش هنسيب حقوقنا ولا حقوق غيرنا تاني

ثورة البنات قدمت كتير ولسه هتقدم أكتر وأكتر

كلنا مع بعض هنرجع حقوقنا)

ياليت كل بنات مصر يفعلون هكذا …................

أصرخي وقوي أنا بنت مصر أشرف وأعظم بنات مصر

أنا كليوباترا .. أنا حاتشبسوت

أنا الملكة شجرة الدُر

أصرخي وقولي الحيوان دا بيتحرش بيا ….

الحيوان دا أهان كرامتي …........... ماتسكتيش عن حقك وكرامتك في بلدك

وياليت المنظمات الحقوقية وخاصةً النسوية منها تترك مكاتبها المكيفة وتنزل لتقف بجوار تلك الفتاة المنتهكة داخل بلدها … حتى تُثبت أنها حقاً تتحدث وتفعل لا مجرد كلمات في الهواء .

"دا لينك التدوينة على جوجل "ثورة البنات

فوبيا المصريين!!!

علمونا من صغرنا ان الكلام في السياسة من المحرمات الكبري وان واحد شيطانة وزة واتكلم قدامك في السياسة ابعد عنة وقولة بينا وبينك حد اللة.

لكن باختصار ياسادة المصريين بقي عندهم فوبياالاضطهاد الامريكي الصهيوني حاجة كدة زي فيلم ليلة سقوط بغداد بقي اي فساد في بلدنا يبقي من غير نقاش وراها امريكا اوسرائيل.
يعني مثلا السجاير امريكية علشان كدة بتجيب امراض مش مشكلة بقي هي معمولة من اية ولاحتي المصنع الي صنعها فين المهم السجاير امريكية وبتجيب سرطان ...ماشي نعديها ’البيسبسي  والكولا بتجيب سرطان اصل لو اخدتم بالكم هاتلاقوا علي الازازة انها بتصريح من نيويوك فاكيد رشوا عليها شوية مبيدات حشرية وسم فران وشوية بلاوي زرقا وجبوها مصر....نعديها برضة ,طبعا الشيبسي والكيك وكل ماشابة من تلك الاشياء الملعونة جاية برضة من امريكا واسرائيل علشان تجيب سرطان للمصرين....طب اية ياجماعة مفيش امراض تانية؟؟...طبعا في الحقن بتجيلنا ملوثة وبتجيب ايذز برضة من امريكا واسرائيل...(ايدز ..التغيير مطلوب برضة)وكمان الشوزات الجلد (الجزم يعني)دي بقي من الجوانتيات بتاعة المستشفيات بتاعة برضة امريكا واسرائيل,وان ادوات المكياج من بواقي قطن المستشفيات...اة نسيت وكمان امريكا اوسرائيل بجهود باسلة مشتركة هما الي دفعوا للثوار علشان يثوروا علي النظام السابق..بعد كدة هما هما الي دفعوا لبتوع ماسبيروا..وبرضة(مش عارفة الناس دي فاضية ولا اية)الي دفعوا لبتوع مصطفي محمود والعباسية..وهما الي دفعوا للبنت الي سحلوها لتشوية سمعة مصر (معلش اصل الفضي وحش) المشكلة ان مصر مش تورتة والعيال بيتخانقوا عليها في عيد ميلاد مصر حلوة وكل حاجة وفيها نيل واهرامات ومتحف الشمع وتحرش و تكاتك وقلبي اختار البت ادراة ......لكن مش للدرجة دي مش كل حفرة بتتعمل في مصر تبقي بتمويل امريكي صهيوني من اجل الاضرار بجزم وعربيات المصريين دة ناقص لو عيل صغير جالة مغص هايقولوا برضة امريكا واسرائيل هما السبب كبروا مخكم يامصرين وبلاش ننشر غسيلنا الي غسلينة من غير اريل(لانة اسرائيلي)كدة علي الملئ وبدل مانفضل نفتخر باجدادنا الفراعنة نحاول نقلدهم علشان احفادنا(دة لو استمر النسل المصري بعد كمية الامراض الي بنستوردها دي)يلاقوا حاجة يفتخروا بيها 

سيكولوجية المتحرش الاقليمي!

طبعا بعد الضجة الكبيرة اللي أتعملت علي يد الرائعة شيرين ثابت ولأنها اتكلمت عن التحرش والمتحرش القاهري وكالعادة بيظلموا المتحرشين الأقليمين فأنا قررت أني أنصفهم وأتكلم عنهم

1-المتحرشين عندنا في الأقاليم والحمد لله مش بيمدوا أيديهم اللي عايزة قطعها  إلا علي غير المحجبات (ودي حقيقة محدش يقدر ينكرها)


2- ممكن سواق ميكروباص أو موتسيكل أو حتى عجلة  يقولوا رائيهم في جسمك وشكلك ولبسك بصوت يسمع الشارع كله والأشنبة الوجودة كل اللي بيعملوه أنهم بيضحكوا ، و لأن بعض الشوارع صغيرة وقليلة فكل ماتعدي يبصولك ويضحكوا!


3- ممكنواحد يقعد جنبك في الميكروباص أو السيرفيز ويفضل طول الطريق يحاول بجد لزق جسمة كلة ولو اعترضتي البية السواق هايركن علي جنب وينزلك


4-في ناس بقي عارفين ان البنت تبقي ماشية خايفة يكتفوا بس من انهم يعدوا من جنبها بموتسيكل ولاعجلة وطبعا لان البنات بقت عندها فوبية فاول ماتسمع صوت وراها بتجري او ممكن تقع المهم تبعد عن مسارة 



5-السادة المتحرشين ممكن  يتحرشوا ببنت لابسة طويل وواسع وميجوش عند بنت لبسة ضيق ومحجزق لمجرد ان علي راسها الرخصة(الحجاب).




6-اكبر نسبة تحرش في الجامعة ولو فكرتي تروحي تقولي للامن ممكن تجيلة ساكتة قلبية من الضحك وبعدها هايقولك الكارنية ياانسة  وبعد كدة يقولك انت باين عليكي بنت ناس متجبيش لنفسك الكلام.


7-نادرااا انك تلاقي بنت ماشية وحدها حتي ولو عز الضهر 


8-لو لاقيت بنات ماشية مع بعضهم اتاكدهم انهم اتخانقوا علي مين تمشي في النص


9-ممكن ولد يشوف بنت يعرفها تم التحرش  بيها في الشارع ومنعا للمشاكل يلف ويمشي من الناحية التانية(منعا للشوشرة علي سمعة البنت في الشارع)


10-من كتر الكبت وللاسف في بنات بتتحرش ببنات بالنظرات والكلام الحمدللة لسة متطورناش لمد الايد


وفي النهاية احب اقول لكل متحرش قاهري او اقليمي او حتي من المريخ ......اتفوا عليك...ياتري بانك تحسسني اني مجرد جسم تحت امر سيادتك انت كدة كملت رجولتك !

ياتري بكلمة او قفشة اونظرة خلاص انت كدة بقيت سوبر مان وسط اصحابك!

يعني اية لما تتحرش بيا وتجري ياجبان تبص لي وتضحك اية مستنيني اعمل اية؟؟ماللاسف في مجتمعنا الغبي بيبصوا للبنت الي بيتم التحرش بيها او حتي اغتصابها انها هي الغلطانة اكتر منك وانت الملاك البرئ تعاليم ربنا الي ماشية علي الارض!

وبرضة اتفوووووووة عليك

تحليل ورؤية شخصية متواضعة لقضية التحرش في مجتمعنا المصري

صباح أو مساء الخير على كل أعضاء وزوار المدونة الكرام

أولاً : وقبل كل شئ أحب أن أحيي كلاً من :

سميرة أبراهيم - شهيدة كشوف العذرية

1.      (سميرة أبراهيم) شهيدة كشوفات العذرية ، والتي تم التحرش بها من قبل كلاب الأمن ، الذين يفترض أنهم يحمون بناتنا ، ولكنهم في الحقيقة هم أكثر من ينتهكون بناتنا ، وللأسف يكون الرد على أي قضية الجملة المشهورة :"هي أيه اللي وداها هناك ؟"

2.      (شيرين ثابت) التي فجرت في البنات والأولاد كل الطاقات دي للكتابة وشجعتهم أنهم يتكلموا وبمنتهى الصراحة والوضوح عن الأخطاء التي تحدث في حق البنات .

3.      ومن قبلها المخرج الشاب العبقري (محمد دياب) مخرج فيلم (6 7 8) الذي تحدث وبمنتهى الجرأة عن قضية التحرش ؛ بل وناقشها في أعمق صورها .

محمد دياب - مخرج فليم 6 7 8 

4.      الفتاة المسحولة في أحداث أعتصام مجلس الوزراء .

ثانياً : أود أن أؤكد أن رسالتي المتواضعة التي تتضمنها تدوينتي أريد أن أوجهها إلى كلاً من :

1.      الضحية (الفتاة المُتحرش بها) - فهي ضحية عدة عوامل ليست فقط ضحية الكلب المتحرش .

2.      المُعتدي بجميع صوره بدايةً من الأعتداء بالنظرة وحتى الأغتصاب ؛ أحب أقوله أن المبررات اللي بتديها لنفسك مش حقيقية وأنت عارف .

3.      المجتمع الساكت عن كل ما يراه ؛ فجميعنا إن لم نكن متحرشين فنحن نشاهد ما يحدث بأعيننا ونساعد على أنتشاره وزيادته وهذا خطأٌ أكبر .

بدايةً أود أن أبدأ مقالي بجزء مقدس من سفر التكوين بالكتاب المقدس :

"⁷وحدث بعد هذه الأمور أن امرأة سيده رفعت عينيها إلى يوسف وقالت: أضطجع معي . ⁸فأبى وقال لإمرأة سيده : هوذا سيدي لا يعرف معي ما في البيت ، وكل ما له قد دفعه إلى يدي . ⁹ليس هو في هذا البيت أعظم مني ، ولم يمسك عني شيئا غيرك ، لأنك امرأته ، فكيف أصنع هذا الشر العظيم وأخطئ إلى الله . ¹⁰وكان إذ كلمت يوسف يوما فيوما أنه لم يسمع لها أن يضطجع بجانبها ليكون معها . ¹¹ثم حدث نـحو هذا الوقت أنه دخل البيت ليعمل عمله ، ولم يكن إنسان من أهل البيت هناك في البيت . ¹²فأمسكته بثوبه قائلة : أضطجع معي . فترك ثوبه في يدها وهرب وخرج إلى خارج ." (تك 39 : 7 ـ 12)

وأيضاً جزءً من سورة يوسف بالقرأن الكريم - الآيات من 23 إلى 29 :

"وَرَاوَدَتْهُ الَتِي هُوَ فِي بَيْتِهَا عَن نَّفْسِهِ وَغَلَّقَتِ الأَبْوَابَ وَقَالَتْ هَيْتَ لَكَ قَالَ مَعَاذَ اللَّهِ إِنَّهُ رَبِّي أَحْسَنَ مَثْوَايَ إِنَّهُ لاَ يُفْلِحُ الظَّالِمُونَ ⁽²³⁾ . وَلَقَدْ هَمَّتْ بِهِ وَهَمَّ بِهَا لَوْلا أَن رَّأَى بُرْهَانَ رَبِّهِ كَذَلِكَ لِنَصْرِفَ عَنْهُ السُّوءَ وَالْفَحْشَاءَ إِنَّهُ مِنْ عِبَادِنَا المُخْلَصِينَ ⁽²⁴⁾ . وَاسْتَبَقَا البَابَ وَقَدَّتْ قَمِيصَهُ مِن دُبُرٍ وَأَلْفَيَا سَيِّدَهَا لَدَا البَابِ قَالَتْ مَا جَزَاءُ مَنْ أَرَادَ بِأَهْلِكَ سُوءاً إِلاَّ أَن يُسْجَنَ أَوْ عَذَابٌ أَلِيمٌ ⁽²⁵⁾ . قَالَ هِيَ رَاوَدَتْنِي عَن نَّفْسِي وَشَهِدَ شَاهِدٌ مِّنْ أَهْلِهَا إِن كَانَ قَمِيصُهُ قُدَّ مِن قُبُلٍ فَصَدَقَتْ وَهُوَ مِنَ الكَاذِبِينَ ⁽²⁶⁾ . وَإِن كَانَ قَمِيصُهُ قُدَّ مِن دُبُرٍ فَكَذَبَتْ وَهُوَ مِنَ الصَّادِقِينَ ⁽²⁷⁾ . فَلَمَّا رَأَى قَمِيصَهُ قُدَّ مِن دُبُرٍ قَالَ إِنَّهُ مِن كَيْدِكُنَّ إِنَّ كَيْدَكُنَّ عَظِيمٌ ⁽²⁸⁾

يُوسُفُ أَعْرِضْ عَنْ هَذَا وَاسْتَغْفِرِي لِذَنْبِكِ إِنَّكِ كُنتِ مِنَ الخَاطِئِينَ ⁽²⁹⁾."

...........................................................

لقد سمحت لنفسي أن أبدأ بهذين الجزئين من كتاب الله المقدس للمسيحيين وكتاب الله الكريم للمسلمين حتى تكون مناقشتي وتحليلي المتواضع لموضوع التحرش قائمة على أساس ديني وأجتماعي ـ أملاً في أن أستطيع أن ألمُ بأكبر قدر من جوانب الموضوع .

أن موضوع التحرش أكبر من أن يحصر في مقال أو حتى سلسلة مقالات لأنه قضية أجتماعية كبيرة لها جوانبها العديدة وأسبابها التي لاحصر لها ، بدايةً من القوى السياسية أوالدينية الحاكمة للمجتمع حتى أصغر فرد في المجتمع ، بمختلف الأعمار والفئات والثقافات ؛ الكل الآن أصبح يتحرش .

الأنثى في مجتمعنا العربي المتخلف والمليء بالأفكار الوهابية المتخلفة يُنظر لها على كونها أداة للمتعة ، بدايةً من أمتاع النظر وحتى المتعة الجنسية ، ونرى الرجال يتبارون في إذلال أي أنثى حولهم بدايةً من أمه مروراً بأخته وزوجته وزميلته في الشغل ومرؤسته وحتى رئيسته أن أستطاع أليها سبيلاً .

فهو في البيت يحيا منذ طفولته كالآمر الناهي الذي يجلس أمام التليفزيون طوال اليوم أما أخته وأمه فطوال اليوم يتنقلون ما بين المطبخ لأعداد الطعام لسي السيد وبين غرفته لتنظيفها ؛ ويا ويلها يا سواد ليلها البنت الغلبانة لو عملت حاجة مش عاجباه ، يمسك الشبشب وينزل عليها ضرب ومحدش يتكلم ، الكل يقولها دا أخوكي وبيربيكي .

وفي الكلية يحاول أن يبحث عن مجموعة من الفتيات ليرضي جميع رغباته :

واحدة بتذاكر ومنتظمة في حضور محاضراتها ... علشان ياخد منها المذكرات وتلخيص المحاضرات .

واحدة دلوعة .... يخرج معاها ويتسلى بيها .

واحدة موزة ..... يتمنظر بيها على أصحابه .

وكام واحدة تاني لزوم الروشنة ... وبكدا يقدر يعمل فيها هارون الرشيد بحريمه .

يتخرج البيه ويشتغل ويبدأ يستغل زميلاته في الشغل علشان يروح كل يوم ويسيب الشغل والشغالة اللي جابتهاله الست الوالدة ـ أقصد زميلته ـ تعمل شغله مكانه .

ويوم بعد يوم يترقى البيه ويعلى أكثر منها ويصبح رئيسها لأنه "لا ولاية لامرأة مجتهدة على رجل حتى لو كان مش بيشتغل" هو برضوا الأفضل لأنه راجل ؛ وبكدا تبدأ مرحلة جديدة من الأذلال والبيه بيتمتع كل يوم وهو حاسس أنه راجل وبيحكم على الست الزميلة .

وأيضاً لا ننسى ما يبثه شيوخ الوهابية يومياً في أذهاننا من كلام متخلف عن أن المرأة عضوٌ أعوج من حق الراجل أن يستخدم كافة الطرق لأصلاحه ولو بالضرب .

وأيضاً الكثير من الأفلام والمسلسلات وحتى البرامج التي تؤكد يوماً بعد الأخر على أفكار أن المرأة عورة يجب تغطيتها أو وسيلة للمتعة يجب أستغلالها على أكمل وجه .

مما أفرز الكثير من الحالات الشاذة في المجتمع الذي يبيح المعاكسة والتحرش بكل الطرق مستنداً على بعض المبررات العقيمة مثل :"هي بتجيب لنفسها" ، "هي اللي بتلبس ضيق" ، "هي اللي مش مُحترمة" ، "أيه اللي جابها هنا" .

وطبعاً اللي زاد الطينة بلة مجلس البلاليص برعاية شركة هولز اللي فيه (الحاجة أم أيمن) اللي بتقترح ألغاء قانون "التحرش الجنسي" مبررةً بأن ملابس البنات هي السبب بمعنى أن البنت هي اللي غلطانة ... يعني من الأخر عاوزة تقول لكل ولد مش بيتحرش بالبنات :"يالا ياحبيبي أتحرش وأعمل كل اللي أنت عاوزه .. ماتحرمش نفسك من حاجة .. محدش هايعاقبك .. القانون هألغيهولك"

ـ كلمة عابرة للحاجة أم أيمن : "أنا بصراحة عمري ماتحرشت ـ كنت أحياناً ببص من بعيد بس علشان كنت بتكسف وبأخاف ، بس أنتي شجعتيني ، قوليلي بقى بنتك بتمر من شوارع أيه ، أو في جامعة أيه ، أو هاتي رقم موبايلها من الأخر كدا ، علشان أنا حابب أنها تكون أول بنت أنا أتحرش بيها .... وماتجيش تلومي غير لبسها ... أنا بريء طبقاً لكلامك ."

ونيجي نلاقي أن شيوخ مجلس الشعب والجماعات الأسلامية التي تتحدث بأسم الأسلام ، وأيضاً قساوسة الكنيسة الذين يتحدثون بأسم المسيحية لا يتحرك أحداً منهم لنصرة هؤلاء البنات الذين يتم التحرش بهم عيناً وفي وضح النهار أمام أعينهم .

غير أنه يُحسب للكنيسة حملات التوعية التي تقوم بها في أجتماعاتها أحياناً لتوعية الشباب ومحاولاتها في بعض المناطق على خلق جوٌ صحي للشباب حتى تقضي على الأفكار الهدامة السالفة الذكر ، أما عن الأسلام فيحسب له الداعية الأسلامي المعروف والمحبوب من المسيحيين قبل المسلمين (عمرو خالد) هذا الذي تحدث كثيراً وقدم برامج توعية كثيرة في هذا المجال .

ولكن على الوجه الأخر فأن الخطاب الديني عامةً خصوصاً الأسلامي ـ لا أقصد الأساء للدين ولكني أتحدث عن الخطاب الديني المسيء للدين ـ يسيء للمرأة أشد أساءة .

أسمحولي كمان أني أقول أن من ضمن أسباب زيادة معدلات التحرش هو زيادة نسب الجهل وعدم الوعي في المجتمع بالثقافة الجنسية السليمة فمعظم معلوماته يستقيها من المواقع الأباحية لأن الحديث عن الجنس ومحاولة السؤال عن أي قضية جنسية يُقابل برفضاً باتاً من قبل المجتمع حتى أن الجزء الوحيد من مناهج التعليم في مدارسنا الذي ييحاول أن يُثري الثقافة الجنسية لدى الفتيان كان لا يتم مناقشته في المدرسة ، من الأخر كدا بيكون شبه محذوف .

كل هذا اللغط هو السبب في التأثير على شخصية الرجل الشرقي في مجتمعنا تأثيراً سلبياً وبيخلي كل تفكيره في المرأة منصباً على مفاتن جسدها فقط وكيف يستطيع أن يحصل على أي لحظة عابرة يلمس فيها حتة منه على السريع ، ولا يفكر أبداً في عقلها أو كيف تفكر ، حتى أن هناك بعض السيدات والبنات وصل بيهم الأمر إلى الأقتناع أنهم ناقصات عقل ودين .. على أساس أنك لما بتتحرش بيها بتكملها دينها يا معفن .

ـ ناس كتير ممكن تقولي أنت متحمل قوي والبنات برضوا غلطانين ... هأقولك أه ، أي بنت تم التحرش بيها غلطانة هي وأهلها كمان !!!!!

عارف ليه ؟؟؟؟؟

·     غلطانة علشان مش مسكتك مسحت بيك أسفلت الشارع كله وبهدلت دين اللي خلفوك أنت وأهلك يا معفن .

·     غلطانة علشان خافت منك ومقدرتش تديلك قلم يفوقك ياروح خالتك .

·     غلطانة علشان نشأت في مجتمع بيحب التعــــتيم (الله الأدرى بالنية) .

·     غلطانة علشان ربنا أنعم عليها بوجه جميل مايفرقش معاك ، المهم التفاصيل الباقية ... مش كدا برضوا ؟

·     غلطانة علشان بتحب تكون شيك زيك ؛ فأنت تفسر دا بأنها بتُيرك جنسياً .... لأ يا حبيبي مش هي اللي بتثيرك جنسياً ، الأفلام السكس اللي بتسهر تتفرج عليها طول الليل هي اللي عملتلك الهوس الجنسي دا ، وهاتيجي في يوم تتحرش بأختك ومش بعيد تتغتصبها مش بنت برضوا وتشبه كل البنات اللي سيادتك بتعاكسهم وتتحرش بيهم ؟

ولو حتى البنت كانت هي اللي غلطانة فعلاً ... أرجع أقرأ الجزء الأول من مقالي ـ سواء كنت مسيحي أو مسلم ـ وأعمل زي يوسف الصديق وبلاش تعاكسها ياروح خالتك .

الموضوع ماخلصش على كدا .. على وعد بتحليل أكبر وأدق وأشمل للموضوع بقدر الأمكان وربنا يكون في عونكم يا بنات مصر يا أشرف بنات العالم .

أخيراً رسالة للمجتمع ككل ... بنات مصر أمانة في رقبتكم يا شباب مصر .
برجاء زيارة الصفحات الآتية :
مقال التحرش جوايا
خريطة التحرش
صفحة قطع أيديك على الفيسبوك

مقال أنا متحرش

مقال لتامر عبد العزيز بعنوان :"أنا متحرش"

مقال رائع جداً

بيقول فيه :..........................

أيوة العنوان مظبوط وأنا أقصد كل كلمة فيه، أنا متحرش، متحرش تحرشًا جنسيًا

يابني اعقل يابني الله يكرمك، أمك عندك على فيس بوك وهتقرا الكلام اللي انت كاتبه ده، والبنت اللي انت بتفكر تخطبها آدي دقني لو بصت في خلقتك بعد كدة متوديش نفسك في داهية، والعيال صحابك اللي شايفينك مثال الأخلاق والكلام اللي مبيأكلش عيش ده هيتصدموا فيك، شيل البتاع ده بسرعة قبل ما حد تاني يشوفه

لأ بقى .. مش هشيله، ويا ريت كل واحد موافق على اللي أنا كاتبه ده يشير

اللي حصل إني قريت التويتس بتاعة شيرين ثابت عن الحياة الضنك اللي البنات في مصر عايشينها بسبب التحرش، اللي جمعتها على فيس بوك في اللينك ده:

 موقع إباحي 

وبعد كدة إمعانًا في جرعة النكد اتفرجت على فيلم 678، وكان من أكتر الحتت اللي أثرت فيا في اللي شيرين كتبته هو:

"#هل_تعلم اني في ظل تلك الظروف العصيبة كل الذكور اللي قابلتهم في حياتي في اي مكان و في اي ظروف قالولي نفس الجملة؟ : انا عمري ما عاكست بنت"

، وفي نفس الوقت من أكتر الكتب اللي أثرت فيا كان كتاب ربع جرام، الكتاب كان بيحكي قصة واحد مدمن وكان بيدور حوالين إن أول خطوة في علاج الإدمان هو الاعتراف بإن فيه مشكلة، وبناء عليه قررت أقول الكلام الآتي:

أنا تامر عبد العزيز، متحرش، وقررت أبطل تمامًا وهعد الأيام اللي أنا هنجح فيها وأعتبرها حاجة مهمة جدًا في حياتي

وعلى فكرة إنت كمان متحرش، أيوة إنت متعمليش فيها خضرة الشريفة، أصل بالعقل كدة لو كل البنات في مصر بيتحرش بيهم يبقى أكيد كل الولاد في مصر بيتحرشوا، بالعقل والمنطق حتى علشان العدد يكفي على الأقل، اهدى بس وركز معايا للآخر وأنا هفكرك إنت إزاي متحرش.

نفتكر سوا كده لما كنت في إعدادي، أوتوبيس هيئة النقل العام اللي كنت بتروح بيه المدرسة، كنت بتدور على الحتة اللي فيها بنت حلوة أو لو مفيش يبقى أي بنت وخلاص وتروح تلزق فيها، أو تقف جنبها طمعًا في اللحظة اللي الأوتوبيس يقف أو يتحرك فيها علشان لو القصور الذاتي خلاك تلمسها يبقى عادي يا جماعة ده القصور الذاتي أنا مليش دعوة، ها معملتش كدة في الأوتوبيس؟ ولا حتى في المترو أو الميكروباص؟ طيب بلاش .. طابور العيش؟ طيب الأسانسير وهو زحمة شوية؟ ولو إنت ابن زوات بقى ومركبتش أوتوبيس ولا وقفت في طابور العيش يبقى في حفلة منير بتاعة الساحل .. طيب حفلة تيستو بتاعة شرم؟

خلينا صرحا مع بعض، إنت عملت كدة في يوم من الأيام ولو مرة واحدة في عمرك، وقعدت ساعتها تقول لنفسك أصل أنا مليش دعوة ده المترو كان زحمة ولا الأوتوبيس هو اللي وقف فجأة على أساس إنك من كوكب بلوتو ومترعرفش إن المترو بيبقى فاضي بس يوم الجمعة قبل الصلاة وإن سواقين الأوتوبيسات عندنا والحمد لله بيتباروا مين يعذب الناس اللي معاه في الأوتوبيس أكتر.

ولو ضميرك نقح عليك قوي بقى هتقعد تقول لنفسك ما هي اللي بتستهبل وحاشرة نفسها في وسط الرجالة، أو كلام من نوع ما هي لو كانت محترمة مكانتش لبست كدة، إيه عمرك ما عملت كدة؟ لا بجد بقى لازم أقول لك يا واد يا مؤمن.

طيب بلاش .. كام مرة قررت تستنى في حتة ما متتعتعش - أي متتحركش - منها علشان الزاوية بتاعتك هايلة وتخليك تشوف شيء ما عاجبك في بنت قاعدة قدامك مثلا في كافيه أو العيادة أو محاضرة أو خلافه؟ ولو إنت بجح بتفضل متنح لها ولو إنت عامل فيها محترم بتفضل تختلس النظر وتفضل عامل قال إيه بتبص في الجرنال أو الكشكول اللي قدامك، أحب أصدمك صدمة عمرك بقى .. لو متنح هي بتاخد بالها وبتبقى محرجة ونفسها الأرض تتشق وتبلعها وبتدعي عليك إنك تموت محروق يا اللي تتشك في نظرك يا بعيد على حسب اللي بيجي في دماغها في اللحظة دي، أصدمك أكتر بقى؟ حوار قال إيه بقى انت عامل فيها محترم وبتبص في الكشكول مبيخيلش عليها برضو، وبتاخد بالها وبتجيلها نفس الأحاسيس السالفة الذكر.

ها عملت حاجة من دول ولا لسه ملقيتش مقاسك؟ طيب ماشي يا سيدي كام مرة شفت حالة تحرش قدامك وضحكت ومعملتش حاجة؟ أحب أصدمك أكتر بقى .. إنت في الموقف ده إنت بتتحرش بيها أكتر من اللي قام بالفعل نفسه، أصل الموقف ده مش بس خلاها  تحس إن فيه واحد حيوان اتحرش بيها، لأ ده بتحس بقى بإنها عايشة في غابة وإن المجتمع ده كله مفيهوش راجل، إنت بالضحكة اللي ملهاش لازمة دي بتخليها تعيش حالة نفسية أسوأ بكتير من إن الموقف ده يكون حصل لها ومفيش حد شايف فتقعد تعزي نفسها بإن لو كان فيه حد واقف كان زمانه رباه، مضحكتش؟ طيب يا سيدي على الأقل معملتش حاجة وسيبته يمر بفعلته بكدة إنت قررت تشجعه أكتر يبقى متحرش كمان وكمان وبالتالي أحب أبشرك .. كدة حضرتك كمان كسبت معانا لقب متحرش.

بلاش ندفن راسنا في الرمل زي النعامة، احنا مجتمع مريض، كل واحد فينا عمل حاجة من الحاجات دي أو على الأقل سكت على حصولها قدامه، والمرة الجاية لما تلاقي الفرصة متاحة والظروف مهيئة هتعمل عبيط برضو وتحاول تنول لمسة طائشة كدة أو كدة أو نظرة في أي حتة أو على الأقل هتسكت على اللي هيعمل كدة قدامك.

طبعًا مش محتاج أفكر كل واحد فيكم بالكلام اللي كل كل بنت وهي ماشية في الشارع بتسمعه والصفير والغمز واللمز واللذي منه، وطبعًا مش محتاج أفكركم بالشباب اللي بيقف على النواصي والشباب اللي بيلف بالعربيات وبيعامل كل أنثى ماشية في الشارع على إنها صيد ثمين وميفوتش واحدة حلوة أو نص لبة من غير ما يطلق النداء الشهير "مصلحة ولا مروحة؟"، ومفيش داعي أفكركم باللي بيحصل في العيد أو شم النسيم، خد بعضك كدة واطلع على الحديقة الدولية في المناسبة القادمة وإنت تعرف مستوى الانحطاط اللي في مجتمعنا واللي أنا وإنت ساهمنا وبنساهم فيه وصل لفين.

كنت سخيف شوية وفكرتك بحقيقتك اللي انت بتحاول تنساها؟ معلش .. أصل هي دي الحقيقة اللي كلنا عاملين قال إيه منعرفهاش، وعلشان كدة أنا قررت إني من هنا ورايح مش هساهم في ده تاني، همنع نفسي من مجرد التفكير في أي حاجة ممكن أي بنت تعتبرها تحرش، مش هسكت لحد بيعاكس في الشارع، هبدأ بنفسي علشان يمكن ربنا يكرم ولو اتجوزت وخلفت بنتي تعيش في مجتمع أحسن.

آه بالمناسبة .. اخطف رجلك كدة لغاية جوجل واكتب عليه كلمة "تحرش" وشوف قد إيه من النتايج ليه صلة بمصر، احنا فعلا حالتنا كرب، وافتكر برضو كام مرة عملت اللي في الصورة دي

لا للتحرش

شيرين ثابت ......

بنوتة مصريّة .... قررت إنّها تكتب عن حاجات من اللي بتحصل في الشوارع بمنتهى الجرأة.

بدأت على تويتر بمجموعة تويتات “هل تعلم؟” وجمعتهم في الآخر مع بعض.

شوفوا شيرين بتقولنا ايه عن التحرش في شوارع مصر

ﻗﺮﺭﺕ ﺃﺣﺮّﺽ ﻛﻞ ﺻﺎﺣﺒﺎﺗﻲ ﺍﻧﻨﺎ ﻧﻜﺘﺐ ﺑﻤﻨﺘﻬﻰ ﺍﻟﺼﺮﺍﺣﺔ ﻭﺍﻟﻮﺿﻮﺡ ﻋﻦ ﻳﻮﻣﻴﺎﺕ ﺍﻟﺒﻨﺖ ﻓﻲ ﺷﻮﺍﺭﻉ ﻣﺼﺮ ﻭﻣﻊ ﺍﻟﻤﺘﺤﺮّﺵ ﺍﻟﻤﺼﺮﻱ. ﻗﺮﺭﺕ ﺃﺣﺎﻭﻝ ﺃﻗﺮﻑ ﺍﻟﻨﺎﺱ ﻋﻠﻰ ﺍﻟﻔﻴﺴﺒﻮﻙ ﻭﺗﻮﻳﺘﺮ ﺑﺤﻜﺎﻳﺎﺕ ﻓﻲ ﻏﺎﻳﺔ ﺍﻟﻘﺮﻑ ﻭﺍﻟﺴﻔﺎﻟﺔ، ﻣﺎﻫﻪ ﺇﺣﻨﺎ ﻣﺶ ﻫﺎﻧﺸﻴﻞ ﺍﻟﻬﻢ ﻟﻮﺣﺪﻧﺎ ﺑﺄﻩ. ﺷﻜﺮﺍً ﻟﺴﻌﺔ ﺻﺪﻭﺭﻛﻢ ﻭ ﺣﻔﻈﻬﺎ ﺍﻟﻠﻪ ﻣﻦ ﺍﻻﻳﺎﺩﻱ ﺍﻟﻄﻮﻳﻠﺔ .

1. #ﻫﻞ_ﺗﻌﻠﻢ ﺍﻥ ﻏﺎﻟﺒﺎ ﺍﻱ ﺭﺍﺟﻞ ﻃﻮﻳﻞ ﻋﺮﻳﺾ ﻳﺸﻮﻑ ﺑﻨﺖ ﺑﺘﺘﻤﺴﻚ ﻣﻦ ﺃﻱ ﻣﻜﺎﻥ ﻓﻲ ﺟﺴﻤﻬﺎ ﺑﻴﺘﻔﺮّﺝ ﻭ ﻣﺎﺑﻴﺤﺎﻭﻟﺶ ﺣﺘﻰ ﻳﻘﻮﻝ ﻛﻠﻤﺔ ﻟﻠﻤُﺘﺤﺮّﺵ؟
2. #ﻫﻞ_ﺗﻌﻠﻢ ﺍﻥ ﺍﻟﺒﻨﺖ ﻣﻤﻜﻦ ﺟﺪﺍً ﻭﻫﻲ ﻣﺎﺷﻴﻪ ﻓﻲ ﺍﻟﺸﺎﺭﻉ ﺗﺴﻤﻊ ﺍﻱ ﻋﺒﺎﺭﺓ ﻋﻦ ﺍﻱ ﺗﻔﺎﺻﻴﻞ ﻓﻲ ﺟﺴﻤﻬﺎ ﻭ ﺣﺘﻰ ﻋﻦ ﺃﻋﻀﺎﺋﻬﺎ ﺍﻟﺘﻨﺎﺳﻠﻴﺔ؟
3. #هل_تعلم ان ممكن جداً واحدة (منقبة) تبقى واقفه في اوتوبيس و فجأه يتم التحرش بيها جسدياً و بكل الطرق الممكنة؟
4. #هل_تعلم ان ماحدش بيتحرّك غالباً؟
5. #هل_تعلم انه من الغريب ان البنت تخرج وتروّح بيتها من غير ماتسمع كلمتين تلاتة عن اراء المواطنين في صدرها؟ وبكل الألفاظ الممكنة؟
6. #هل_تعلم ان لو لبس البنت مش عاجب سيادته بيعتبر التحرّش بيها حق مكتسب له؟ والغريب هو ان الناس تحاول تمنعه؟
7. #هل_تعلم ان في واحد غبي على تويتر بيسألني دلوقتي انتي واثقة من الكلام ده؟ و عرفتي منين؟
8. #هل_تعلم ان سواق الميكروباص مرة طلع نص جسمه من الشباك و شتم البنت كل الشتايم الأبيحة هي و أهلها عشان زرارين الشيميز بتاعها مفتوحين؟ ولما اتخانقت معاه شتمني وكان هايضربني و الرجاله اللي في الميكروباص مانطقوش؟
9. #هل_تعلم ان مرة واحد على سلّم المترو كان نازل جنبي بيقولي أقذر الألفاظ ولما شتمته كان هايضربني و اتلموا الناس يلوموني انا عشان صوتي عالي؟
10. #هل_تعلم ان في خان الخليلي شباب بيعاكسوا 24 ساعة بمنتهى قلة الادب ولو اتخانقت معاه هايبجّح و يقل ادبه اكتر ؟؟ - عن تجربة
11. #هل_تعلم ان مافيش اي فرق بين قذارة المتحرشين مع المحجبة و قذارة المتحرشين مع الغير محجبة؟ وماينفعش حد يفتي في ده غير بنت جربت الحالتين .
12. #هل_تعلم ان ممكن جداً كل فترة تقابل واحد في الشارع قرر يفتح بنطلونه ويفرّج البنات على عضوه الذكري بالعافية؟
13. #هل_تعلم ان مافيش بنت فاتها أي لفظ أبيح في شوارع مصر؟؟؟ كلنا بنسمع كل الكلام اللي ممكن أي حد يتخيله؟؟؟ وبنحمد ربنا 
    انها جت على قد الكلام ومامدّش ايده؟؟؟
14. #هل_تعلم ان لو بنت مشيت في الفجالة هاتتعاكس بمعدّل كلمة مش محترمة كل 3 ثواني؟ و #هل_تعلم ان حصل مشكلة كبيرة بسبب كده من اسبوعين لإن اصحاب المحلات هرّبوا المتحرش اللي ضرب البنت لما شتمته؟
15. #هل_تعلم ان في واحد تاني على تويتر بيقولي مدام البنت لابسه محزّق يبقى التحرش عمل ايجابي؟
16. #هل_تعلم ان بعد عملية التحرّش بتفضل البنت متوترة و اطرافها ساقعة وفاقده القدرة على الكلام لمدة تعتمد على طريقة التحرش؟
17. #هل_تعلم ان أكتر من نص المُتحرش بهم بيتكسفوا يحكوا لأهلهم من كتر البشاعة؟ يعني لو حد قالك ترضاها لاختك وقلت اختي بتلبس محترم، لا يا بأف اختك بتتعجن بس انت اللي ماتعرفش.
18. #هل_تعلم ان في انسان على تويترا تعليقاً على موضوع خان الخليلي بيقولي: يبقى انتي عايزة كده ليه بتروحي هناك وانتي عارفة؟
19. #هل_تعلم ان اي بنت هاتقف في الشارع مستنية تركب او مستنية حد ، عادي جداً يعدي عليها عربيات تفتحلها الباب و البأف اللي جوة يدعوها للدخول؟ على اعتبار انها اكيد عاهرة إلى أن يثبُت العكس؟ خصوصا في شارع خاتم المرسلين الهرم
20. #هل_تعلم ان لما صديق حكالي على جرأة حرامي في سرقة الموبايلات في المترو جاتلي هيسترية ضحك؟ باعتباري مُت موتات احسن من دي بكتيييييييير !!! مستغرب من جرأته في سرقة موبايل. مش في سرقة قفشة!
21. #هل_تعلم ان تلت تربع رجالة تويتر منقسمين لنص شايفني ببالغ خصوصا على التحرش بالمحجبات ونص شايف ان البنت هي اللي غلطانة بسبب لبسها؟ وواحد عايز يوصفلي احساس الراجل لما بيشوف لبس ضيق؟
22. #هل_تعلم ان رداً على كلامي عن التحرش بستقبل بعض التحرشات على تويتر والفيسبوك حالاً؟
23. #هل_تعلم اني في ظل تلك الظروف العصيبة كل الذكور اللي قابلتهم في حياتي في اي مكان و في اي ظروف قالولي نفس الجملة : أنا عمري ما عاكست بنت
24. #هل_تعلم ان ممكن الناس تعدّي للمتحرّش الفاظه السافله و كلامه عن أكثر أجزاء جسم البنت خصوصية وتقفيشه كمان بس لو البنت قالتله #احا يبهدلوها؟
25. #هل_تعلم ان بسبب صديقنا المتحرّش مكن بنات ماتخرجش من بيوتها اساساً و مايمارسوش حياتهم بصورة طبيعية؟
26. #هل_تعلم ان صديقتي مابتلبسش غير اللون الاسود بسبب التحرش ويوم ماتلوّن بيبقى يوم اسود عليها؟ مأتم إجباري
27. #هل_تعلم ان البنات ممكن تحكي حكايات التحرش دي للأبد ومش هايخلّصوا؟
28. #هل_تعلم ان الملايين من الشباب اللي بيتحرّشوا بالبنات دول هم نفس الناس اللي دخلت فيلم شارع الهرم هم هم اللي انتخبوا الحرية والعدالة؟
29. #هل_تعلم ان ربنا طلب منك تغض البصر؟
30. #هل_تعلم ؟ سؤال لمرضى تويتر
31. #هل_تعلم ان صديقتي اللي معاها اليكتريك في شنطتها سوّاق التاكسي اعجب بيها وقرر يخطفها في عز الضهر ووسط البشر والزحمة و ماسابهاش غير لما ضربته؟
32. #هل_تعلم ان في حد بيرد على موضوع ربنا قال غض البصر و بيقول، ماهه طلب من البنت برضه الاحتشام قولي الحقيقة كاملة؟ طيب اولاً التحرش بيطول كل انواع الملابس ثانيا وده الأهم، وانت مالك هي مابتسمعش كلام ربنا انت رايح تجيبله حقه يعني؟
33. #هل_تعلم ان التحرش الجنسي وصل كمان لمرحلة ان في بنات بتتحرش بالولاد؟ الحق يقال يعني.
34. #هل_تعلم ان في واحد على تويتر رده على موضوع الألفاظ السافلة في الشارع ان البنات كمان على تويتر بأوا بيشتموا براحتهم؟
35. #هل_تعلم ان لمسة إنسان لجسم فتاة مايعرفهاش بدون إرادتها بقت مسألة وجهة نظر؟
36. #هل_تعلم ان أول حادثة تحرّش كبيرة حصلتلي ومش هاقدر انساها ابداً كان معايا اتنين صاحباتي وكنّا في رابعة ابتدائي؟
37. #هل_تعلم اني اتعلمت الشتيمة على ايد المتحرشين؟
38. #هل_تعلم ان انا نفسي يبقى عندي اليكتريك؟ و اي سلاح ادافع بيه عن نفسي؟
39. #هل_تعلم ان أي حظيرة حيوانات فعلاً أكثر تحضراً من شوارع مصر المحروسة؟
40. #هل_تعلم انه راجل عنده 60 سنة ودقنه قد كده و بيفصص جسمها حتة حتة بمنتهى الوقاحة و بعدين يبصلها بقرف ويبص الناحية التانية؟
41. بطنكوا وجعتكوا؟ معلش، #هل_تعلم ان عادي جداً ان المتحرّش يضرب البنت من ورا في وسط الشارع متخذاً في ذلك تامر حسني قدوة و يضحك و يجري ولا كإنه عمل حاجة؟
42. #هل_تعلم ان ده اكتر يوم رجالة تويتر قلوا ادبهم عليا فيه؟ فعلاً الحقيقة بتوجع وكل واحد باين عليه جداً هو انهي نوع من البشر
43. #هل_تعلم ان انا مش ناوية اسكت؟ دوّر انت على حل انا مش عارفة اعمل غير اني ارغي
44. #هل_تعلم ان جملة التحرير وحش عشان فيه تحرش دي أكتر جملة كوميدية في الدنيا؟؟؟؟
45. #هل_تعلم اني في مرة من المرات بطرد الرجالة من عربية السيدات و عشان يغيظني نزل من الباب اللي انا واقفه عنده مع ان 
46. الباقي مفتوحين لمجرد انه يزنق نفسه فيا وهو نازل و يجري؟
47. #هل_تعلم ان المعاكسة الرقيقه اللي هي كلمة بسيطة حلوة وخلاص بقت رفاهية دلوقتي وانقرضت اساسا؟ واحدة صاحبتي فرحت جدا عشان واحد قالها شعرك زي موج البحر :)
48. #هل_تعلم ان رمسيس مكان مرعب ليا لإن اكيد اكيد هاتعرض للمعاكسة والتحرش هناك؟
49. #هل_تعلم انها مش محروسة ولا اللي فيها آمنين ولا اي حاجة من الأحلام دي من سنين طويلة؟
50. هو انت كنت فاكر الأمن مستتب؟ طب #هل_تعلم ان مرة واحد راكب موتوسيكل وقف قدامنا زماااان عند المدرسة واحنا بنات في اعدادي وفتح زراير القميص ولقيناه لابس تحته براه وبيضحكلنا ويشاورلنا واتفزعنا؟
51. #هل_تعلم ان التحرش الجنسي ده بيعتبر اغتصاب علني للبنت؟ عارف اختك اغتصبوها كام مرة؟
52. #هل_تعلم ان كل مابيعدي جنبي ولد في الشارع ايدي بتتحوّل لوضعية البوكس أوتوماتيك وضربات قلبي بتزيد؟
53. #هل_تعلم ان سن المتحرش بيكون 12 سنة فيما فوق؟
54. #هل_تعلم ان التحرش في الشارع و الجامعة والفيسبوك و تويتر و التليفون و الموبايل؟
55. #هل_تعلم ان انا ماعنديش حل للمشكلة دي؟ ماحدش يسألني تاني بأه !!! ماهه لو عندي حل ماكنتش قرفتكوا كده
56. #هل_تعلم ان كلهم في الشارع بقوا بالنسبالي شبه بعض؟
57. #هل_تعلم ان كونك متحرش وحيوان ده بيفقدني أنا جُزء من إنسانيتي؟؟ انا ممكن أعمل مصيبة بسببك!
58. #هل_تعلم ان الكلام في الموضوع ده مكانش فكرتي؟ انا قررت كده لما لقيت اتنين من صاحباتي بالصدفة البحتة قدامي عالتايم لاين بيتكلموا عن التحرش وواحدة منهم في حالة انهيار؟

البنت دي كتبت 58 تويتة تحكي فيها عن ألوان التحرش اللي بتحصل معاها
ياترى أمتى هاتضفي يامصر ؟؟؟؟؟؟
للمزيد
أتكلمي

مسيحيو مصر والمشاركة غير الإيجابية

مقال لمعلمي فتحي فريد بعنوان :"مسيحيو مصر والمشاركة غير الأيجابية"

دا لينك المدونة المأخوذ عنها هذا المقال

مدونة المجنون

فى هذه الأيام تحيا مصر حالة من الصخب السياسي والإجتماعي فبعد سيطرة تيار الإسلام السياسي على مقاليد السلطة التشريعية (مجلس شعب - مجلس شورى) وزيادة النعرات الدينية المطمئنة والمخيبة للآمال أصبح الخوف والفزع هما المحركان الرئيسيان للمشاركة الإجتماعية للمسيحيين المصريين ، وعقب وفاة البابا شنودة الثالث أصبحت الكنيسة غير واضحة المواقف والرؤى وصار كل أسقف أو مرشح للمقعد البابوي يستقطب ويسعى لفرض سيطرته وسلطانه على شعب الكنيسة أملا فى إعتلاء الكرسي البابوي والحصول على غفران الرئيس القادم مما فعلة شباب الكنيسة من الإنضمام لصفوف الثوار والخروج عن أوامر الكنيسة وتعليماتها.

فبعد خروج اللواء عمر سليمان من سباق الرئاسة وكذلك الشيخ حازم أبو إسماعيل والقيادي الإخواني خيرت الشاطر أصبحت كافة الإتفاقيات والتربيطات بين بعض القيادات الكنسية وهؤلاء المرشحين فى مهب الريح أملا فى أن يعود أحدهم للسباق مره أخرى فتبرم العقود وتنفذ الوعود.

وبعيدا عن السجال الرئاسي هاجر عدد ليس بقليل من المصريين المسيحيون إلى بلاد أوروبا وأمريكا هربا من الخوف المزروع فى القلوب من قرب وصل التيارات الإسلامية إلى سنده الحكم ولا يرى من بينهم أي إعتدال فالجميع مغالون وبالتقية يتوارون وبأحلام المواطن يتاجرون بهموم الوطن يزايدون.

هرب المواطن المصري المسيحي لأنه لم يعد يشعر بأن مصر بلدته ولا فيها حياتة ولا أمانه هرب بحثا عن الذات وعن الأمان فى بلاد لا يشعر بها اي من كان بالحميمية الوطنية وروح التألف الوطني الذى ننشد بيه فى كل صباح.

ليسوا مجنى عليهم بل هم أيضا جناه هم هربوا وتركوا البلاد والعباد فى مهب الرياح لم يعملوا من أجل مصلحة وطنهم وبنى دينهم بل من إستطاع منهم النجاه بنفسه فعل ومن لم يستطع ينتظر مصير غير معلوم.

فرحوا بهروبهم وجلائهم عن ديارهم وبلادهم وكأنهم لحقوا بأخر قطارات الخلاص، وتناسوا أنهم أيضا جزاء مما نحن فيه اليوم فلم يشاركوا من ذي قبل فى الحياة الإجتماعية بشكل واسع بعيدا عن الكنيسة الإرثوزوكيسة وسلطه العباءة السوداء وجبروت الكهنوت الذى قد يستغله البعض لفرض سياسات بعينها لا تخدم الصالح العلام ولا الخاص بل تخدم مصالح أفراد كل ما يميزهم عن العامة هي عابئتهم السوداء وحسب.

لست هنا لأنصب نفسي قاضيا على الكنسية ولكنني أعرض ما قد يسقطه البعض للوصول سويا إلى حقيقة الأمر، فبعد غياب البعد الوطني وتغليب المصلحة الوطنية على عموم الأمور أصبح غالبية المسيحيون المصريين المشاركون فى الحراك السياسي عقب الثورة يعملون بنفس النمط الديني والعقلية التي تربت على السمع والطاعة للسلطة الكهنوتية متمثلا فى المقولة الأشهر ( على إبن الطاعة تحل البركة)، فجرى منهم من جرى يلهث خلف حزب ساويرس أملا فى النجاة من هجمة الإخوان والسلف (حزب المصريين الأحرار) وكأنهم بهذا يصنعون لأنفسهم كنيسة جديدة بعيدة عن الكنيسة الأم ولكن بنفس الشروط والأحكام.

وغيرها من الحركات الإحتجاجية التي خرجت لتحمل مطالب الأقباط وحدهم وحسب وليس لنا فى هذا مقال أو مقام غير أنه أمر مطلوب وبشده ولكن أن لا يحمل بين طياته أي بعد طائفي وأن لا يكون قيادة مثل هذه الحركات السياسية قائمة على تعليمات وتوجيهات قيادات دينية مهما صلحت أو فسدت.

وحين نرى خروج المصريين المسيحين فى وداع البابا شنودة الثالث فى كل بقاع المحروسة يودعون أباهم الروحي ولهم منا خالص التعازى، ولكنني لم أر 20 % من هذه الأعداد تخرج إحتجاجا على تأسيسية الدستور أو أي إشكالية وطنيه أخرى.

إن كان يرى البعض أن للمسيحين المصريين قضاياهم الخاصة وهى الأهم أن تطرح ومن يؤيدون هذا الإتجاه ينسوا دائما أنه لابد من أن يجلب انصار للقضية القبطية من خارج صفوف الأقباط والكنيسة حتى تأخذ البعد الإجتماعي فى النصرة والدعم.

ولكن هل القضايا الخاصة بالمسيحين المصريين تغنيهم عن الأشكاليات الوطنية الجامعة؟؟؟

لذا تضح الصورة كاملة أن جزء من المسؤولية التاريخية فى تلك الفترة الحرجة التي تمر بها مصر على عاتق المصريين المسيحيين وعليهم ان ينتبهوا لهذا الخلل الجسيم فى تكوين الشراكة الإجتماعية مع الوطن وقضاياه الإشتباك السلمي فى المتغيرات السياسية أصبح أمر إلزامي لا يخضع للنقاش أو التأويل.

ونخلص إلى أهم النقاط التي بحاجة إلى مراجعة وإعادة نظر بشكل حقيقي وفعال فى إعادة الإندماج الوطني بين المسيحين المصريين وباقي أطياف المجتمع :

أولا : أن تلتزم الكنيسة بدورها الروحي والعقائدي فقط ولا تتدخل فى الشئون العامة مثل حشد اصوات المسيحين لمرشح بذاته أو فرض مرشح على البسطاء منهم للتصويت له فى أي إنتخابات.

ثانيا : إعادة إنتاج وطرح قيادات جديدة شبابية تحمل على عاتقها القضايا القبطية الخاصة وقضايا الوطن العامة بعيدا عن تلك القيادات التي صنعها نظام المخلوع وأعوانه على مدار الثلاثون عاما الماضية وأصبح هذا جليا حين أعلن عمر سليمان عن ترشحة للرئاسة فخرج من صنعهم مهللين بحمده وشاكرين أمجاده ونعمه عليهم.

ثالثا : الإنخراط وبقوة فى الأحزاب المدنية واليسارية ودعمها بشكل إيجابي وحقيقي حتى تصبح الكتلة المدنية المصرية قوة بشكل كاف فى مواجهة التصعيد والصعود من قبل تيارات الإسلام السياسي.

رابعا : خروج رجالات الدين المسيحي من المشهد السياسي كافه حتى يستطيع التيار المدني مناهضة تدخل رجال الدين فى الحياة السياسية فلا يعقل أن نناهض تدخل الدين فى الشئون العامة وعلى الإتجاه الأخر نرى رجالات دين المسيحي  يقودن مسيرات وتظاهرات.

ومازال الوطن يحتاج الكثير والكثير من جهودنا سواء

Shababeeeek ........... شبابيـــك: هل أنا عورة ؟؟؟

Shababeeeek ........... شبابيـــك: هل أنا عورة ؟؟؟