welcome

Welcome our visitors that come to visit us on our Blog
This blog reflects the views of its owners only
You have the right to agree or disagree with our views

مرحباً بكل زائر يدخل على مدونتنا
هذه المدونة تعبر عن آراء أصحابها فقط
لك الحق أن تتفق أو لا تتفق مع آراءنا
الصفحة الرئيسية للمدونة على الفيسبوك :( https://www.facebook.com/pages/Egyptian-Sokrat-egygirl-mn2ota-Blog/254929104594264 )

Adver.

Jun 4, 2013

أنا وأنت السبب ـ مقال لسارة عز الدين

كتبت سارة عز الدين هذا المقال بعد ما أثير نتيجة نشر الفيديو المسيء للرسول منذ عام تقريباً، أما عن سبب نشري هذا الكلام الآن فهو بمثابة رسالة لكل المتدينيين الشكليين الذين لا يرون في الدين سوى شكلياته، ويتركون جوهر الدين، آلا وهو التسامح؛ أترككم مع المقال:

·      الكلام دا موجه لنفسي قبل أي حد .....
·      أنا وأنت اللي أصرينا  نشوف الفيلم ونديله أهتمام ...
·      أنا وأنت اللي الدم غلى في عروقنا لما شوفنا الفيلم ...
·      أنا وأنت اللي قولنا معاً لمقاطعة المنتجات الهولندية ..
·      أنا وأنت اللي قولنا لازم نعمل شير، والكيبورد مش هتخرب والكلام الغريب دا ...
·      أنا وأنت اللي قولنا نعمل وقفة عند السفارة الأمريكية ...
·      أنا وأنت اللي حرقنا علم أمريكا ...
·      أنا وأنت اللي رفعنا علم القاعدة ...
·      أنا وأنت اللي فرحنا لما قتلنا سفير أمريكا في ليبيا ...
·      أنا وأنت اللي غيرنا صور البروفايل لنصرة نبينا ...
·      أنا وأنت اللي رفعنا شعارات "إلا محمد"، "فداك أبي وأمي ... يا رسول الله"، "ياللى غيرتم على إلهام .. فين غيرتكم على الإسلام" ...
·      أنا وأنت اللي نشرنا صورة اللي عمل فيلم وقولنا كام أتفوووو وكلام غريب كده برضوا
·      بس أنا وأنت لما أصرينا نشوف الفيلم ونعمل شير
·      مخطرش في بالنا إن إحنا كدا اللي نشرنا الفيلم.
·      مخطرش في بالنا إن مكنش في حد عنده علم أصلاً بالفيلم ده، وإن الفيلم مكنش حد هيشوفه غير منتجه ومخرجه وكام واحد من أصحابهم ..
·      أنا وأنت لما نزلنا السفارة وتحمسنا وحرقنا علمهم ورفعنا علم القاعدة
·      مخطرش في بالنا إن في وسائل أعلام بتصور قالو عننا مصريون يحتفلون بذكرى الحادي عشر من سبتمبر بإنزال علم أمريكا ورفع علم القاعدة في ظل وجود مكثف لأنصار القاعدة وصور أسامة بن لادن !!
·      يا ولاد اللعيبة، بقى هي الحكاية كدا، الفيلم يتعمل للإساءة للرسول صلى الله عليه وسلم، وبعدين ضجة إعلامية، وبعدين دعوة للسفارة يوم 11 سبتمبر بالذات، وبعدين يطلع الإعلام يقول أنصار بن لادن والقاعدة وإرهاب.
·      مخطرش في بالنا برضه إن في ذكرى 11 سبتمبر نظم بعض الأمريكيين وقفات تحمل شعارات "المسلمين لم يفعلوها"؛ ونـحن أمس بـ(ليبيا ومصر) أعترفنا على نفسنا ... يا أُمة ضحكت من جهلها الأُمم ...
·      أنا وأنت لما قتلنا السفير الأمريكي مخطرش في بالنا إن إحنا كده للأسف رسخنا معتقداتهم السيئة عن الإسلام من إنه دين تعصب وتطرف وإرهاب.
·      أنا وأنت لما غيرنا صورة البروفايل باسم سيدنا النبي مخطرش في بالنا إن الأهم من تغيير صور البروفايل تغيير أصحابها ...
·      أنا وأنت لما رفعنا شعارات "إلا مُحمد" وغيرها ... مخطرش في بالنا أنه مش بالكلام، ماحنا أتكلمنا كتير قبل كدا، فين أفعالنا اللي تدل على صحة كلامنا وصحة الشعارات دي اللي بنرددها.
·      أنا وأنت لما نشرنا صورة اللي عمل الفيلم المُسيء واعتبرنا اللايك بيساوي أتفوو ... مخطرش في بالنا أن العالم بيضحك علينا وعلى سذاجتنا، مخطرش في بالنا أن الكام أتفوو اللي هنلمهم مش هم اللي هيردوا أعتبارنا.

·      اللى كان محيرنى بجد أول لما شوفت الفيلم أيه سبب حرقة دمي دي ؟؟ ... مع العلم أنى مش ملتزمة أوي في ديني ... ياترى غيرتي على ديني .. طيب لو كانت غيرة !!
·      ماغيرتش ليه على ديني لما ماصلتش الفجر .. أصلي كنت نعسانة.
·      ماغيرتش ليه على ديني لما غشيت في الامتحان .. أصل الامتحان كان صعب.
·      ماغيرتش ليه على ديني لما ضيعت شهر رمضان وأنا قاعدة على الفيس بوك.
·      ماغيرتش ليه على ديني لما زغت من الشغل.
·      ماغيرتش ليه على ديني لما بعت ضميري.
·      ماغيرتش ليه على ديني لما انخدعت في الدقون، وسمعت فتوى من شيخ وبقيت أرددها وكأني ماليش عقل أعرف أعقلها بيه.
·      ماغيرتش ليه على ديني لما سمحت لشيخ زي دا بيستغل نفسه في أنه يكفر فلان وفلان على منبر المسجد بل أحيانا في التليفزيون.
·      ماغيرتش ليه على ديني لما بقيت أكتفي بترديد آيات قرآنية بشكل سطحي دون النظر لتفسيرها وأقول قال الله وقال الرسول وأنا أبعد ما يكون عن الله والرسول ... أستغفرك ربى !!
·      ماغيرتش ليه على ديني لما تنازلت عن مبادئي في الواسطة والرشوة وغيرها.
·      ماغيرتش ليه على ديني وأنا واقف أعاكس المُزة اللي ماشية هناك دي.
·      ماغيرتش ليه على ديني لما متابعتش سُنة سيدنا النبي اللي أنا بحبه.
·      ماغيرتش ليه على ديني لما ماخدتش الرسول قدوتي, ومالوش لزوم أقول مين كان قدوتي.
جايين نغير دلوقتي على الدين وعلى سيدنا النبي ... ماغيرناش على ديننا ليه من الأول .. هو لازم نتعرض للإهانة ؟؟؟
·      يؤسفنى أبلغك أن  حمقتي وغضبك قد لا يكون سببها غيرة على الدين زي ماحنا بندعي .. لو كان عندنا غيرة على دينا كنا غيرنا عليه من الأول ... كنا حطينا الدين في المقام الأول في كل حاجة، أخلاقنا ومعاملتنا وكل حاجة .. لكن للأسف أحنا معملناش كدا .. زي ما قال الجـخ.
·      أحنا مارسمناش نبينا في العيون، إحنا فهمناهم إن الدين بتاعنا لا فيه علوم ولا فيه عمل ولا فيه آدب ولا فيه فنون ... أتلهينا بإحنا كنا و إحنا كنا؛ و نمنا في اللي راح يكون.
·      طب الحل ... يا ترا ممكن فعلاً نعمل حاجة المرة دي؟ .. ممكن نصلح نفسنا؟ .. ممكن نبدأ بالتغيير؟ .. ممكن ناخد بالنا من نقطة مهمة؟ .... إن أي تصرف غير لائق منك أنت هيدي إنطباع سيء عن الإسلام والمسلمين زي ما حدث بالفعل, ولا هنعمل زي كل مرة نغير صورة البروفايل يومين تلاتة أسبوووع، ونردد شعارات ,والموضوع ينتهى ,وكأن شيئا لم يكن؟؟؟
سامحنا يا الله .. سامحنا ياسيدى يارسول الله .. أعِنا على التغيير
رب أعزنا بالإسلام وأجعل الإسلام يعتز بنا

Sara Ezz

 لرؤية المقال الأصلي أضغط هنا أنت وأنت السبب
Post a Comment