welcome

Welcome our visitors that come to visit us on our Blog
This blog reflects the views of its owners only
You have the right to agree or disagree with our views

مرحباً بكل زائر يدخل على مدونتنا
هذه المدونة تعبر عن آراء أصحابها فقط
لك الحق أن تتفق أو لا تتفق مع آراءنا
الصفحة الرئيسية للمدونة على الفيسبوك :( https://www.facebook.com/pages/Egyptian-Sokrat-egygirl-mn2ota-Blog/254929104594264 )

Adver.

Jun 16, 2012

وانت مالك!!

انتشر اوي علي الفيس بوك اليومين دول صور وتعليقات بمقارنات واضحة بين جمهور اليورو الاوربي والجمهور المصري الغلبان وطبعا البنات كان ليهم نصيب الاسد في المقارنة دي ....انا بس عندي استفسار صغير عمرك قبل كدة شفت شئ  بلوري اسمة مراية...لو انت هاتقرني ببنات العم سام من حقي اني اقارنك باولادهم ولو انت هاتقرني بلبس ومكياج بناتهم ياتري انا كبنت مصرية لو لبست بدي كات وميني جيب سيادتك كولد مصري رد فعلك هايكون اية؟ميتهيئليش اني حتي هالحق اطلع علي اول شارعنا !
مفيش بلد مفيهاش تحرش بس كمان مفيش بلد في العالم فيها (رجالة)مصرين ...يعني مثلا في يوم الصبح وانا رايحة الامتحان وعلي وشي غضب اللة وشعري ملموم وحتي مفيش خصلة مش قصة ومفيش نقطة مكياج علي وشي  وبلوزة بكم طويلة وبنطلون  عادي جدا لا اسيكني(استرتش)ولا فيزون.ويعدي واحد سواق عربية  نص نقل ويقولي هاتروحوا من ربنا فين اية......الي انتوا فية دة؟؟ دة بالزمة اقولة اية بجد كان نفسي اتلفت واقولة اعمل اكتر من كدة اية طيب!!!!!! رغم ان التحرش مش سببة ابدا لبس ولاشكل البنات بس اهو تقول اية بقي.....المشكلة مش فينا كانثوات لالا المشكلة في الجينات الذكورية واحلام اليقظة الي بتحول اي بنت ماشية في الشارع بمجرد نظرة لواحد ةطالعة من فيلم اغراء المكشلة مش فينا فعلا المشكلة في خيالهم المريض المحتاج لدكتور نفساني  وفي الاخر  يعملوا جروبات لمقاطعة الجواز من مصريات لتحسين النسل ...ياشيخ روح اتنيل حسن من تفكيرك افتكر بني ادم مش مجرد حيوان عايش عشان رغباتة وشهواتة يعني بمنظرك دة هايبصولك ذوات الشعر الاصفر والعينين الزرقا علي اية ...احنا راضين بيكم غلب مش اكتر ..انا مش مستنية رائيك فيا ولارايك في لبسي عشان تقولهولي بصوت عالي وتضحك عليا الناس مش مستنية تجيلي اكتئاب بكلامك دة لانك جيبتهولي فعلا وجيبتة لكل بنت مصرية من وهي سنها 10 سنين بالكتير من اول مرة اتحرشت بيها مش مستنية تناقشني عشان تعرف اني مثقفة اكتر منك وان انت ولاحاجة لانك مش بتستخدم دماغك غير في قلة الادب وبس مش مستنية تحكم عليا اني مجرد شي تطلع فيها كل ميولك السادية لان  دي واضحة جدا من نظرتك
انت مالك!كلمة نفسي اقولها لكل بني ادم اتحكم علينا واتكتب في بطاقتة ذكر وبيتعامل مع اي انثي ماشية في الشارع علي انها من ملكات ايمانة ..انت مالك البس اية ؟انت مالك اضحك ولامضحكش في الشارع اية المشكلة ان بنت تبتسم ولاحتي تضحك في الشارع ومسموح لسيادتك تقف تحت البلكونات قرب الفجر وتصحي الشارع كلة علي نكتك وكلامك الحقير الي زيك وضحكتك المستفزة؟؟وانت مالك اكون متحجبة ولاسابغة شعري وعملاه كيرلي؟؟وانت مالك اكون لابسة بكم ولانص ولاحتي قط؟؟وانت مالك اكون حاطة مكياج وانشالة عملة فرح في وشي  وانت مالك؟؟وانت مالك لابسة لون فاتح او غريب؟؟؟وانت مالك وانا سايقة عربية ولا هو شعور طبيعي انك لازم تزنق وتغتت علي اي بنت  وتبقي شايف انها بنت منحرفة احب اقولك انك انت الي منحرف بافكارك الي صورتلك كدة ؟انت مالك بجد انت لية ماشي تحاسب اي بنت في الشارع في الكلية او حتي في البيت علي تصرفتها؟؟لية لما يجي حد من اصحابك لازم تخفي اختك ومش بعيد كمان امك من البيت وتقول لا انا اختي محدش يشوفها ياعم روح اجري ماهي في الشارع والبشر كلها بتشوفها طول اليوم لية بتتعامل مع اي انثي في حياتك من اول امك لحد بنتك علي انهم جواري سيادتك الي عظمتك اويهم بعطفك السامي في الحرملك؟؟بجد خليك في نفسك متقرنيش بحد لاني لو قارنتك باي راجل في العالم متهئيلي ان وزارة الهجرة هاتشتكي من كتر طلبات البنات عشان يهجوا من وشك ....كلمة اخيرة خليك في حالك لانك ملكش سلطة عليا مهما كنت ...وانت مالك

Jun 9, 2012

يعني أيه تحرش جنسي ؟ - مقال لغدير أحمد مؤسسة صفحة ثورة البنات

يعني أيه تحرش جنسي ؟

يعني البنات مبيعرفوش يمشوا في الشارع
مش علشان الجو حر والتراب والتلوث ماليين الشارع
لكن عشان ممشيتش مرة في الشارع وسلمت منهم

واحد واقف مستني تاكسي قال يقول رأيه في جسمي ولبسي
والتاني قال رأيه في مشيتي اللى زي العسكري ، اللى بتمنى فيها أن الشارع يخلص واخلص معاه من القرف اللى بشوفه



عارفين أنا اصلي بخاف أمشي في الشارع أوي


يقابلني شاب راكب عجلة ولا موتوسكل يلمسني أو يمد أيده عليا ويطلع يجري !!
فاتخرس وأمشي من سكات وأدعي ربنا أن محدش يكون خد باله إن جسدي أُنتهكت حرمته ؛ وبكمل في طريقي عشان مبلاقيش حد يقف جنبي !!!!!!!
اللى هيقولى لبسك السبب واللى هيقولي أيه اللى نزلك من بيتك أساساً
كأني كنبة ولا قطعة ديكور مكانها البيت وخلاص !!!


لو سلمت من المعاكسات اللى بيسموها محترمة ، ونجيت من الموتوسكل أو العربية اللى صاحبهم يلمسني ويجري مبسلمش من نظراتهم على جسمي !!!
لو روحت أشتري حاجة البياع مبيبصش في عينيا وأنا بكلمه لكن بيبص على صدري مهما لبست واسع أو حاولت أخبي جسمي بالكتب أو بشنطتي

ولما بشتري برجع بضهري لورا علشان هو أكيد هيبص برضوا ...!!!


الحقيقة بقى عاوزة أقولكم حاجة :
في نظرة تطفلية وممكن البنت تتجاهلها
لكن في نظرة سافلة كلها إيحاءات جنسية بدايةً من تحريك العين وحركات الجسم والأيد لحد اللسان اللى بيتحرك على الشفايف كمحاولة منه في إغرائي مثلاً !!


أما عن الكلمات البذيئة فحدث ولا حرج
وأنا ماشية بلاقي واحد ميّل عليا وهمس في ودني بكلمات غاية في السفالة ، مبعرفش أتصرف أزاي ...
طيب أعمل أيه ؟
أقول للناس قالي أيه أزاى ؟


أما المترو والأتوبيس فدول حكايتهم حكاية أصلاً
تقريبا مفيش بنت ركبت أتوبيس أو مترو أو أي مواصلات عموماً إلا وتم التحرش بيها حتى لو راكبة تاكسي من النضيف أبو عداد



وأكتر حاجة مقرفة وتخليك تكره جنسك وتلعن اليوم اللى جيت فيه هي لحظة بيتم فيها أنتهاك جسمك وأستباحة عرضك ويقولك معلش اصلها غريزة

الغريزة اللى تخليك تلغي عقلك وتدنيك من الحيوانية ، متفرحش بيها
حقك تحط راسك في التراب لأنك مستخدمتش عقلك اللى بيفرقك عن الحيوان بالتحكم في غرائزك


قالك ظروف البلد والفقر والبطالة
أمال أبو عربية بكام 100 الف ده بيطلع ايده من شباك عربيته ويضرب البنات ويدوس بنزين ويجري ده مبرره أيه ؟


قالك كمان مش لاقيين يتجوزوا
مع أن اللي بيتحرش بيكون في منهم اللي أصلاً متجوز ، طب ده مبرره أيه ؟
والاطفال اللي في إعدادي والصبيان اللى في ثانوي ... برضو عايزين يتجوزوا ؟
ولا هي ثقافة بدأت تنتشر واستفشت في مجتمع غابت فيه القيم ؟



خلّي بالك
أختك ، أمك ، مراتك ، بنتك
مش في مأمن من التحرش ، هما بس اللي مبيتكلموش
جرب تشجعهم على الكلام ، هتسمع مواهب ..... !!!

حقوقي بسيطةعاوزة مساحتي وحريتي في الشارع
مش عاوزة حد يقول رأيه فيا ولا شخص يعتدي على خصوصياتي ولا يبيح لنفسه الغلط حتى لو شايفنى غلطانة
عاوزة أنزل بالليل أشتري اكل وأنا متطمنة
وعاوزة لما أتخنق ، أنزل أتمشى من غير ما أسمع كلمة تضايقني
ولا نظرة تنهش في لحمي
وعين تعريني حتى لو لابسة كله أسود في أسود
حقي محدش يستبيحني
حقي أعيش كإنسان له حقوق وعليه واجبات
أنا بنت ، أنا إنسان ، أنا حُر .
بقلم :



Jun 2, 2012

رسالة بخصوص الجولة الثانية من الأنتخابات الرئاسية


أخواتي أقباط ومسلمي مصر ؛
من واقع كوننا جزءٌ أصيل من نسيج هذا البلد ، ولسنا خواجات كما يحلو للبعض أن يدعونا كذباً في أفتراء واضح على حقائق التاريخ الساطعة .
فمن هذا المنطلق الوطني وليس من أي نزعة طائفية منغلقة ، أدعوكم بشدة إلى التوحد جميعاً للتفكير بشأن الدعوة لمقاطعة الأنتخابات أو أبطال أصواتنا فيها ـ (وإن كنت أنا شخصياً أؤيد أبطال الصوت) ـ بدعوى عدم وجود من يُمثل القوى الثورية (وإنا أتفق مع هذا فعلاً فكلا المرشحين يمثل أجهاضاّ للثورة إما دينياً أو عسكرياً) ولكن المسألة الآن أصبحت محسومة ، وهي التصويت للدولة المدنية المتمثلة إضطراراً في "الفريق أحمد شفيق" (وأنا شخصياً ضده) ضد الفاشية الدينية متمثلة في مرشح الأخوان المسلمين "دكتور محمد مرسي" .
فالدولة المدنية حتى لو أتت لنا بحاكم لا يحقق تطلعات شعبه لكنها تحوي بداخلها آليات تسمح بتغييره (فهي تقبل النقد والخروج عليها) ، عكس الفاشية الدينية التي تسحق أرادة شعبها مُتسترةً وراء الدين ومقولة أن "الخروج على الحاكم حرام شرعاً" .
أما عن الوعود البراقة التي تحدث بها "محمد مرسي" واصفاً الأقباط بأنهم شركاء الوطن فأبلغ رد عليها هو المثل الشعبي القائل : "واحد بيقول للتاني نام علشان أدبحك ، قاله دا شئ يطير النوم" .
وأقول أيضاً إسألوا أنفسكم عن الوعود التي قطعها الأخوان على أنفسهم ثم نكثوا عنها بعدها بأيام قليلة قبل أن تساهموا ولو سلبياً في صعود دولة الفاشية الدينية التي لن تترك الحكم قبل خمسين عاماً من الآن حتى نكون قد أصبحنا قندهار الثانية وبئس المصير .
أما عن ما أذاعه الأخوان الكاذبون ومعهم بعض الأعلاميين المهرتلين عن أن الأقباط أعطوا جميعاً أصواتهم لشفيق لأسباب طائفية ؛ فدعونا نفند كلامهم بالتحليل المنطقي :
أولاً : كيف تقولون أسباباً طائفية ؟ ... هل "أحمد شفيق مسيحياً مثلاً ؟
ثانياً : لن ننكر كون أن بعض القيادات الكنسية قد وجهت الناس لتأييد شفيق ؛ لكننا أيضاً يجب أن نرصد الجانب الأخر في الكنيسة وهو موقف القائم مقام البطريرك "نيافة الحبر الجليل الأنبا باخوميوس" حين أمر بحل لجان المواطنة للتحقيق في هذا الأمر كتصحيحاً لهذا الخطأ في الوقت الذي يجب آلا نغفل ما كان يحدث داخل مساجد القطر كله من تأييدٍ لمرشحين التيار الديني وعلى رأسهم "الدكتور محمد مرسي" مرشح الأخوان المسلمين ولم يتم الألتفات إليهم أو محاسبتهم ؛ فقبل أن نلوم القيادات الدينية المسيحية يجب أيضاً أن نـحقق فيما يحدث في المساجد أيضاً من باب الشفافية والحق .
ثالثاً : أن أصوات الأقباط لم تذهب كلها لشفيق لكنها كانت منقسمة بين مرشحي التيار المدني القديم متمثلاً في شفيق وموسى وبين مرشحي التيار الثوري متمثلاً في خالد علي وحمدين صباحي ؛ وهذا ما أشهد عليه بما رأته عينيا في حملات مرشحي التيار الثوري .
رابعاً : يرى الأقباط في شفيق ـ خاصة عند مقارنته بمرسي ـ أنه رمز الدولة المدنية في مقابل الفاشية الدينية الأسلامية التي ستتطيح بالأخضر واليابس والمسيحيين والمسلمين على حدٍ سواء .
أخيراً أود أوضح أني كنت ولا أزال مؤيدا لمرشحي الثورة (حمدين صباحي وخالد علي) فقط دون غيرهما ، وأكرر


يسقط يسقط حكم العسكر (شفيق)


يسقط يسقط حكم المُرشد (مرسي)

للعلم ؛


أنا لا أقصد أستمالة الرأي العام تجاه الفريق أحمد شفيق ، ولكني أود فقط ألا نظلم أنفسنا ؛ وللعلم أنا لا أزال أفكر في المقاطعة لكننا دعونا نُعيد النظر .

في أنتظار تعليقاتكم وأرائكم فياليتنا نتفق على رأيٌ واحد تكون فيه مصلحة وطننا مصر
توقيع ....؛
سقراط المصري
2-6-2012