لا للقنوات الدينيه المتعصبه

مساء الخير عليكم يا مسيحين ومسلمين مصر
اللي يعرفني فيكم كويس يعرف ان في قلبي علي لساني يعني من الاخر مش لازم اقول للغلط صح عشان كل الناس شايفينه صح
المقدمه دي عشان عارفه اني هتهاجم منكم بس مش مهم انا هعمل الصح
انا من الاخر معترضه علي وجود القنوات الدينيه المسيحيه والاسلاميه
هتكلم الاول عن القنوات اللي بشوفها اللي هي المسيحيه المستفزه
انا مش قصدي كل القنوات انا قصدي قناتين بالتحدييد هما اللي مزودينها اوي
حاضر هقول يعني ايه مزودينها
مزودينها يعني بيبينوا لينا ان المسلميين مش بني ادمين وبيجيبوا
قصص تخوف المسيحين من المسلميين وبتنمي جواهم الرعب
ومش بعيد تنمي جواهم الكره لانهم شايفينهم بعبع
وطبعا نبتدي احنا كمسيحين نتجنبهم ومنتعاملش معاهم
ليه بقي بنضايق في يوم زي يوم احد ماسبيرو لما ناس من المسلميين موقفوش جانبينا
س سؤال انت كمسيحي وقفت جنبيه في ايه قبل كده ولا علطول خايف منه
انا مش بتكلم طبعا عن كل الناس انا بتكلم عن الناس اللي بتشتري طلباتها منسوبر ماركت عم مش عارفه ميين عشان مسيحي وتسيب التاني ها الكلام واضح
ندخل بقي في القنوات الاسلاميه انا مش بشوفها بس اللي بشوفه علي النت منها طبعا قصدي القنوات السلفيه انهم بيبينوا للمسلمين اننا كفره نستاهل القتل وميتعاملوش معانا ومحدش من المسلمين يقولي كلامك غلط لاني بسمع بوداني
مع احترامي ومحبتي الكامله ليكم انتوا بردوا غلطانين انكم بتسمعوا الكلام وبس من غير تفكيير بردوا انا مش قصدي علي اصحابي المسلمين المعتدلين انا اقصد المتطرفيين
فكر كده يا للي بتسمع القنوات دي اخوك المسيحي عملك ايه وحش عشان كره الناس لييه بالشكل ده
فكروا كلكم ان القنوات الدينيه اللي من هذا النوع بتخلق جوانا كره لبعضينا مش محبه
انا بدعي لمقاطعه كل القنوات المستفزه وملهاش اسم غير كده
  اللي موافق اوكي اللي مش موافق ميحجرش علي رايي لاني مقتنعه بيه 
في النهايه انا بحب مصر اوي وعندي احساس قوي انها مش هتنهض عير بينا احنا الشباب

تعالوا نتعامل مع بعض بانسانيه مش بدينبه  l

بنت  مصريه مسيحيه منقوطه tota

فين البنات اللي بشعرهم؟المسيحين راحوا فيين ؟؟؟؟

أمبارح اللي هو يوم الأحد بتاريخ 4-3-2012 حضرن ندوه للسيده بثينه كامل مرشحه الرئاسه المحتمله والبطل الثائر أحمد حراره قبل ما أحضر الندوه أحساسي كان لا يوصف ومشاعري كانت فياضه كده وكنت هموت من الفرح أني هشوف أحمد حراره - بصراحه مكنش فارق معايا أوي بثينه كامل بالرغم أنها أشهر منه لكن اللي كان فارق معايا أني أشوف أحمد حراره ده بيتكلم أزاي بيضحك ازي ؟ هل لسه عنده أمل ؟ طيب لو عنده أمل ؟ أيه أحساسه وفيه واحده بتجره من أيديه تقوله علي السكه - من الأخر أنا مكنتش مهتمه بالندوه السياسيه لأن أنا عارفه الكلام اللي هيبقي فيها
 أنا كنت مركزه أوي في ميين هو أحمد حراره
يووووه معلش الكلام عن البطل أخدني - أنا كنت ناويه أحكي عن فقعه المراره اللي حصلتلي أول ما روحت الكليه اللي كان فيها الندوه (كليه الأداب في المسرح )لو حد عارفه
المهم دخلت الكليه مبسوطه تقريبا مش نايمه مستنيه هذا اللقاء - قابلت ناس كتيير أصحابي سلمت عليهم طبعا وتوقعت من غير ما أقولهم أن فيه ندوه - أكييد هما عارفيين لأن اليافطه الي مكتوب فيها الدعوه علي باب الكليه تسد عييييييييين الشمس
لكن اللي يغييظ أن أغلب الناس - سوري معلش كل الناس اللي قابلتهم رفضوا يحضروا الندوه لأسباب في غايه التفاهه منها اللي مش عارف ميين أحمد حراره أصلا - منها اللي ملوش في جو السياسيه - وأقولهم ده مش جو سياسيه ده جو مصري وأغاني ودنيا لذيذه - اللي يتريق عليا من جانب ويقولي سبنالك الوطنيه واللي يقولي أشوفك في المعتقل والكلام ده
طبعا ده مزعلنيش علشان أنا زعلت من كلامهم ده لامؤخذه في الكلمه نقطني لأن الناس دي مش حاسه بالبلد واللي بيحصل فيها واللي غاظني أكتر أن كل أصحابي اللي شوفتهم المسيحين
قررت أرمي طوبتهم وأتجه للمسرح أنفض للي سمعته وأكمل أبتسامتي العريضه أني هشوف عين الوطن وفوجئت يا جماعه أن فييه ناس كتيير منقباات ومحجبات - قولت في سري أحنا المنياويه مش بنيجي في ميعادنا أكييد في ناس مسيحيين جايين في السكه - أستنييت ساعه وأتنيين دخلت بنت بشعرها وأستريحت - قولت لسه أكييد فيه ناس جايين - لقيت أن الندوه بعد ما أتأخرت 3 ساعات برضوا مفيش مسيحين فيها
عايزه أقولكم مكنتش عارفه أودي وشي فيين من الناس؟ كنت حاسه في عيونهم بيقولولي وأنتي ءايه اللي جابك ؟؟ أو هو فيه مسيحيين لسه مصريين؟
ممكن ميبقاش ده اللي كانوا عايزين يقولوه بس ده اللي حسيته -مع الأخذ في الأعتبار أنا معنديش أي مشكله أني أبقي في مكان كله مسلمين بالعكس كلهم أصحابي وأنا بحب قعدتهم عن المسيحين اللي دلوقتي بدور عليهم مش لقياهم بس أنا هدفي من الكلام ده أني أقولكم أن السلبيه وصلت لدرجه أن رمز الوطن (حراره)يتريقوا عليه ويقولوا شراره وكلام من هذا القبييل
أحب أفرحكم أن في نص الندوه بنتين أصحابي بشعرهم جوم ودول رجعولي الأمل تاني بس برضوا يعني ءايه 4 ينات مسيحين في وسط 200 بنت مسلمه 

أنا مش عارفه هما المسيحين اللي هما ماليين الكنايس؟ بيختفوا ليه في أماكن يبينوا فيها للناس أنهم بيحبوا وطنهم؟ هو فعلا زي ما الناس قالتلي من أصحابي بلا مصر بلا وكسه أشتري دماغك - هل المنطق ده ماشيين بيه أغلب الناس؟ 

أنا اللي أتعلمته من ديني أني أحب الناس وأحب بلدي وأظهر للناس محبه ربنا اللي فيا وأخليهم يعاملوني كأنسانه قبل ما يعرفوا ديانتي - 

المشكله الحقيقيه أننا فاهمين كمسيحين أننا صح وميه ميه طالما أحنا موجوديين في الكنايس اليوم كله لكن الناس اللي بره تولع أو أ,ووه لللالاااه أزاي هكلم ناس مسلميين وأتعامل معاهم ؟؟ 

خبرتي القليله تقولي أن المسلمين أصحابي مش بيعضوا علي فكره دول بني أدميين بيحسوا أوي بيحبوا وطنهم أوي فخورين أنهم مصريين - أه فيه مسيحين كده بس ليه متبقاش دي القاعده العامه زييهم ؟  ليه منغرش في بعض في حب الوطن؟؟ ليه منقولهمش أحنا أهوو - المسيح اللي فينا بيحبكم - مش لازم بالكلام بس لازم نبين ده بالأفعال

في النهايه أنا لسه منقوطه

أمانه عليكم لو حد شاف بنت بشعرها حضرت أي ندوه يقولي يفرحني يمكن النقطه تروح

تحيا مصر - والجدع جدع والجبان جبان وأحمد حراره بطل الميدان 

بنت مصريه مسيحيه منقوطه من المسيحين

tota